नेपाली फिल्म क्षेत्रका पुराना कलाकार सुनिल थापाले बलिउड फिल्ममा कमब्याक ‘मेरी कोम’ मार्फत गरिसकेका छन् । ‘मेरी कोम’मा सुनिल अभिनेत्री प्रियंका चोपडाको गुरुको रुपमा देखिएका थिए । सुनिलको कमब्याकलाई लिएर खुबै चर्चा भयो । उनै सुनिल थापाले अर्को बलिउड फिल्ममा पनि काम गर्ने भएका छन् ।
अभिनेत्री विपाशा वासुलाई लिएर निर्माण हुन लागेको फिल्म ‘भाई मस्ट वी क्रेजी’मा सुनिल थापा पनि देखिनेछन् । यो फिल्मबाट अर्का नेपाली कलाकारले पनि बलिउडमा पाइला राख्न लागेका छन् । चर्चित हाँस्य कलाकार विल्सन विक्रम राइले यो फिल्म मार्फत बलिउडमा पाइला राख्न लागेका हुन् । फिल्मको निर्देशन विनय शर्माले गर्न लागेका छन् ।
फिल्मको छायांकन सम्पूर्ण नेपालमा हुने चर्चा थियो । तर, नेपालमा भारतले अघोषित नाकाबन्दी लगाएकाले छायांकन प्रभावित भएको हो । अब, ४५ दिनसम्म फिल्मको छायांकन थाइल्याण्डमा हुने पक्का भएको छ ।फिल्ममा अर्का चर्चित बलिउड कलाकार पंकज कपुर देखिनेछन् । जसले फिल्ममा डनको भूमिका गर्नेछन् ।
जंगलमा विपाशाले पंकजलाई पछ्याएको दृश्य खिचिनेछ । सुनिललाई फिल्ममा एग्रिमेन्ट गरिसकिएको छ । अर्का कलाकार विल्सन विक्रमलाई संझौता गर्न र नेपाल घुम्न निर्देशक विनय नेपाल चाँडै आउने कुरा छ । फिल्म छायांकनका लागि विल्सन र सुनिल जनवरीको अन्तिममा थाइल्याण्ड जानेछन् ।
