युवा स्टार अनमोल केसी र पूर्व मिस नेपाल श्रृष्टी श्रेष्ठ स्टारर फिल्म 'गाजलु' सुटिङ सेटबाटै महँगो रकममा बिक्री भएको छ । केहि दिन पहिले फ्लोरमा गएको यो फिल्मलाई बितरण संस्था एफडी कम्पनिले महंगो 'एमजी'मा आफ्नो कब्जामा लिएको हो ।
निर्माता रोहित अधिकारीले ४५ लाख बढी रकममा फिल्म 'एमजी'मा एफडीलाई बिक्री गरेको दाबी गरे । लगातार दुई हिट फिल्म दिएका राम्रो फ्यान क्रेज भएका युवा स्टार अनमोलको यो फिल्मप्रति आँखा लगाउने धेरै बितरण कम्पनि भएपनि अन्ततः एफडीसँग 'एमजी'मा साझेदारी भएको निर्माता अधिकारीले फिल्मीखबरलाई बताए ।
शुक्रबार निर्माण टिम र एफडी कम्पनीको तर्फबाट अध्यक्ष नरेन्द्र महर्जनले साझेदारी पत्रमा हस्ताक्षर गरेका थिए । यो फिल्मलाई हिट निर्देशक हेमराज बिसीले एक्शन कट गरिरहेका छन् । राम्रा कलाकार र राम्रो निर्देशक रहेको फिल्ममा धेरै संभावना देखेर मोटो रकम खर्चेको वितरक महर्जनले बताए ।
लभस्टोरी बेसको यो फिल्ममा अनमोल र श्रृष्टीसँगै गौरी मल्ल, विश्व बस्नेत, कृष्ण मल्ल, सलोन बस्नेत, गौरव पहारी, मेनका प्रधान लगायतको अभिनय रहनेछ । फिल्मलाई अर्को बर्ष बैशाखमा रिलिज गरिने तयारी स्वरुप निर्माण टिम फ्लोरमा गएको हो ।
