फिल्म 'क्लासिक'को निर्माण यूनिटले एक वियोगान्त गीतको अडियो सार्वजनिक गरेको छ । युटुबमा सार्वजनिक भएको 'हारें हारें' गीतले फिल्मको कथालाई चित्रित गर्नेछ ।
म्यूजिक लभ स्टोरी यो फिल्ममा आर्यन सिग्देल र नम्रता श्रेष्ठको मुख्य भूमिका छ । सुवास गिरी इन्टरटेन्मेन्ट र आर्यन सिग्देल इन्टरटेन्मेन्टको संयुक्त ब्यानरमा यो फिल्मको निर्माण गरिएको हो । आँखा देख्न नसक्ने दुई पात्रको प्रेम कथामा यो फिल्म निर्माण भएको छ ।
फिल्ममा वियोगान्त, रोमान्टिक गीत समावेश छन् । संगीतकार ताराप्रकाश लिम्बुले भने-'यसअघि `नोभेम्बर रेन`का गीत दर्शकले मन पराइदिएपछि हामीलाई 'क्लासिक'का गीत अझ उत्कृष्ट बनाउने चुनौती थियो । जसअनुसार काम गर्ने प्रयास गरेका छौ ।'
सार्वजनिक गीतमा ताराप्रकाश लिम्बुको संगीत, दिनेश राउतको शब्द र यूवराज चौलागाइको स्वर छ । 'नोभेम्बर रेन'को 'तिमीलाई म के भनु' बोलको गीतमा ताराप्रकाश र यूवराजले एकाएक चर्चा पाएका थिए ।
माघ २९ गतेबाट यो फिल्म देशभर प्रदर्शनमा आउनेछ । फिल्मको गीत अनुसार भिडियो पनि तयार भएको कोरियोग्राफर रेनशा वान्तवा राईको भनाई छ ।
