अभिनेता जीवन लुइटेल र सामान्य प्रशासन मन्त्री लालबाबु पण्डित एकै मञ्चमा देखिए । एक एल्बम बिमोचनका क्रममा सँगै देखिएका यी दुई पात्रको अवस्था भने बिल्कुल भिन्न छ ।
मन्त्री पण्डित अहिले सरकारी कर्मचारीले कि तजागिर कि त डीभी र पीआर छाड्नुपर्ने अभियानमा छन् । यता, अभिनेता जीवन लुइटेल भने अमेरिकाको ग्रिनकार्ड एप्लाई गरेर नेपाल फर्किएका हुन् ।
जीवनले आफूले कुनै देशमा भिख नमागेको भन्दै पाएको खण्डमा लिने र नपाएपनि खासै फरक नपर्ने बताउदै आएका छन् । जीवनले आफ्नो परिवार पनि हेर्नका लागि आफूले ग्रिनकार्ड एप्लाई गरेको बताएका थिए ।लालबाबुले कर्मचारीपछि अब सरकारी जागिर खाने कलाकारले पनि डीभी र पीआर छाड्नु पर्ने बताए । उनले देशका गहना भन्ने कलाकारले अमेरिकाको संविधान मान्छु नेपालको मान्दिन भन्ने कुरा आफूलाई चित्त नवुझेको बताए ।
मन्त्री पण्डितका कुरा ग्रिनकार्ड एप्लाई गर्ने जीवनले सुनिरहेका थिए । तर, उनले यस बिषयमा कुनै पनि प्रतिक्रिया दिन मानेनन् । नेपाली कलाकारले अमेरिका पुगेर डीभी र पिआर एप्लाई गरेको कुरा सधै नै चर्चामा रहन्छ । मन्त्री पण्डितले यो कुरा उठाएपछि अहिले फेरि कलाकारको डीभी र पीआर मोह चर्चामा छ ।
