यो बर्ष सपनाको मुलुक भनिने अमेरिकामा धेरै कलाकार पुगे । ग्लोब फिल्म फेस्टिबलमा सहभागी हुन धेरै कलाकार अमेरिका पुगेका छन् । तर, यही फेस्टिबलका लागि अमेरिकाले केही कलाकारलाई भने सही ठानेन ।
केकी अधिकारी, सुनिल थापा, नन्दिता केसी, सुरेश दर्पण पोख्रेल, सुशान्त मैनाली लगायतका फिल्मीकर्मी अमेरिकामा छन् । तर, अमेरिकाले अभिनेत्री पूजना प्रधानलाई भिसा दिएन । पूजनाको नाम कार्यक्रममा सहभागी हुने भनेर लामो समयदेखि चर्चामा रहेपनि उनले भिसा पाइनन् ।
चर्चित हाँस्य कलाकार विल्सन विक्रम राइलाई पनि अमेरिका भिसा दिएन । विल्सन विश्वका थुप्रै देश पुगिसकेका छन् । तर, अमेरिकामा उनको माग भएपनि उनले भिसा पाएनन् ।यस्तै, म्यूजिक भिडियो निर्देशक तथा संचारकर्मी भुषण दाहाल र छायांकार विदुर पाण्डेलाई पनि अमेरिकाले भिसा नदिएको खबर आएको छ । उनीहरू कुन कार्यक्रमको लागि भिसा थाप्न गएका थिए भन्ने बारे खुलेको भने छैन ।
गायिका कोमल वलीले अमेरिकामा आयोजना हुन लागेको सांगीतिक कार्यक्रमका लागि अमेरिका जाने तयारी गरेपनि उनले नपाएको चर्चा छ । कोमललाई अमेरिकाले धेरै पटक भिसा दिएको छैन । अमेरिकाले भिसा नदिएपछि अहिले यी कलाकार चुपचाप छन् । गीतकार तथा निर्माता नरेश देव पन्तलाई पनि अमेरिकाले भिसा दिएको छैन । यि बाहेक पनि थुप्रै फिल्मकर्मी र सञ्चारकर्मीलाई अमेरिकी राजदूतावासले भिसा दिन आवश्यक ठानेन ।