भूकम्प पीडितका लागि राहत दिने भन्दै निर्माताद्धय दीपकराज गिरी र दीपाश्री निरौलाले पुरानो फिल्म ‘छ एकान छ’ पुन रिलिज गर्न लागेका छन् । आउँदो शुक्रबारबाट यो फिल्म देशभरका फिल्म हलमा लाग्ने दिपकको भनाई छ । फिल्मबाट आएको शेयरको सम्पूर्ण अंश भूकम्प पीडितका लागि खर्च गर्ने उनीहरुको भनाई छ ।
‘छ एकान छ’ हिट भैसकेको फिल्म हो । यो फिल्म काठमाण्डौ र काठमाण्डौ बाहिरका धेरैजसो फिल्म हेर्ने दर्शकले हेरिसकेका छन् । फिल्म युट्युबमा पनि आईसकेको छ । यसैले पुन: रिलिज गर्दा यसबाट ठूलो धनराशी आउँछ भनेर अड्कल काट्न गाह्रो छ ।
दीपक र दीपाले नै निर्माण गरेको फिल्म ‘वडा नम्बर छ’ असोज १ गते चल्दैछ । यो फिल्मलाई यो समयमा प्रदर्शन गर्ने वा च्यारेटी गरेर रकम उठाउने हो भने राम्रै रकम उठ्छ, जसले भूकम्प पीडितका लागि ठूलो राहत दिन्छ ।
तर, आजसम्म आफ्नै गोजीबाट १ रुपैयाँ पनि नलिकालेको यो जोडीले यूट्युबमा समते आइसकेको फिल्म प्रदर्शन गरेर केही गर्यौ है भनेर देखाउन खोजिरहेका छन् । दिपक आफ्नो फिल्म ‘वडा नम्बर ६’ प्रदर्शनका लागि तयार भैनसकेको बताउँछन् । तर, यो फिल्मलाई जेठमा नै प्रदर्शनमा ल्याउने तयारी सुरुवातमा गरिएको थियो । यसैले यो फिल्मको च्यारेटी वा प्रदर्शनका लागि तात्ने हो भने समय लाग्दैन ।
यसकारण, नयाँ फिल्म चलाएर वास्तविक समाजसेवा गर्ने हो कि ? प्रचारका लागि त चाउचाउ बाँडेर फोटो खिचाउनेहरुले पनि गरेकै छन् त ?
