नेपालबाट बलिउड गएका केहीले मात्र आफूलाई अब्बल प्रमाणित गर्न सकेका छन् । आफ्नो प्रतिभाले बलिउडलाई समेत कायल पार्नेमा मनिषा कोइराला र उदित नारायण झा अग्रणी मानिन्छन् ।
वैशाख १२ गतेको भूकम्प पछि विदेशका थुप्रै सेलिब्रेटीले नेपालको विपत्तिमा सहानुभूति र ऐक्यवद्धता प्रकट गरिरहेका छन् त कतिले सहयोग उठाउने क्रम जारी छ । भारतमै रहेकी मनिषाले पनि नेपालीलाई परेको विपत्तिलाई अनभूत गरी कहिले नागपुर त कहिले मरिसस पुगेर राहत जुटाईरहेकी छिन् ।
तर नेपालमा नै संघर्ष गरेर बलिउडमा स्थापित भएका उदित नारायण झाले भने आजसम्म सहयोग त परेको कुरा विपत्तिमा परेका नेपालीप्रति सहानुभूति पनि प्रकट गरेको सुनिएको छैन । बरु बलिउडकै ठूला कलाकार अमिताभ बच्चन, शाहरुख खान, आमिर खान, प्रियंका चोपडा आदिले सामाजिक संजालमा स्ट्याटस पोस्ट गर्दै भूकम्प पीडित प्रति समवेदना प्रकट गरेका थिए ।
नेपालसँग भावनात्मक सम्बन्ध बाहेक केही नभएका कलाकारले त नेपालको विपत्तिमा ऐक्यवद्धता जनाईरहेका बेला उदितको खोजी हुनु स्वाभाविक नै हो । मन नहुँदा पैसा नदिएपनि भयो तर कमसेकम सामाजिक सन्जालमै सही नेपालको दुःखमा साथ छु भनेको भए उदितको के जान्थ्यो ?