चर्चित हाँस्य कलाकार मदनकृष्ण श्रेष्ठ ६४ बर्षमा प्रवेश गरेका छन् । उनले आज आफ्नो जन्मदिन मनाएका हुन् । रेडियो अडियोले आफ्नै प्राङ्गणमा आयोजना गरेको कार्यक्रममा मदनकृष्णले केक काट्दै आफ्नो जन्मदिन मनाए ।
मदनकृष्णले जन्मदिन मनाउँदै गर्दा देशमा संविधान बनोस् भन्ने कामना गरे । उनले नेताहरुलाई आफ्नो स्वार्थ पुरा हुने दाउ हेरेर संविधान नबनाउन आग्रह गरे । यसरी संविधान बनाउँदा देश झनै बिग्रने उनको भनाई थियो ।
मदनकृष्णले आफू अब विस्तारै ठिक भएकोले हाँस्य व्यङ्ग्य क्षेत्रमा लागिरहने बताए । रोगले छुन खोजेपनि आफू लडिरहेको उनको भनाई थियो । मदनकृष्णले केक काटेपछि हरिवंश आचार्यले उनलाई ख्वाइदिएका थिए ।
मह जोडीका एक हरिवंशले मदनकृष्ण १६४ बर्ष बाँच्ने बताए । उनले मदन दाइको साथले आफू सधै नै सक्रिय रुपमा अगाडि बढेको बताए । हाँस्य कलाकार दिपाश्री निरौलाले तितो सत्य यूनिटको तर्फबाट मदनकृष्णलाई हाँस उपहार दिएकी थिइन् । उनले मदन दाइ र हरि दाइले देखाएको बाटोमा आफूहरु हिडेको बताइन् ।
कलाकार मनोज गजुरेलले मह घरको आवश्यकता रहेको बताए । कलाकार शिवहरी पौडेलले मदनकृष्ण र हरिवंशको कारणले आज आफूहरु भएको बताए ।