बलिउडका अभिनेता सलमान खान सन् २००२ देखि हिट एन्ड रन केसको पछाडि दौडिरहेका छन् । मदिरा पिएर गाडी चलाउँदा सडक पेटीमा सुतेका मानिसलाई गाडीले कुल्चदा १ को निधन र ३ घाइते भएको मुद्दा सलमानले भोगिरहेका छन् ।
गाडी चलाउने मानिस सलमान खान नै भएको उजुरी परेपछि लामो समयदेखि बहस जारी छ । तर, मुद्दाले अहिलेसम्म कुनै फैसला पाएको छैन । शुक्रबार अभिनेता खान पहिलो पटक अदालतको कठघरामा उभिएका थिए । उनले गाडी चलाउने आफू नभई आफ्नो ड्राइभर भएको बताएका थिए ।
सोमबार अदालतमा बयान दिदै सलमानका ड्राइभर अशोले गाडी आफूले नै चलाएको बताएका छन् । ड्राइभरको यो बयानबाट सलमान खानमाथि लाग्दै आएको मुद्दाको फैसला कस्तो हुने हो समयले नै बताउनेछ ।
सलमानले ड्राइभरले मदिरा सेवन गरेर गाडी चलाएको कुरालाई पनि इन्कार गरेका थिए । उनले गाडीमा आफूसहित ४ मानिस भएको बयान दिएका थिए ।
