केहि महिना अगाडि श्रीमती मधु भट्टराईको भिसा नलागेपछि अभिनेता राजेश हमाल एकसाथ जोडी बाँधेर अमेरिका जान पाएका थिएनन् । उनको हनिमुन अमेरिकामा मनाउने योजना असफल भएको थियो । हमालले मधुलाई लिएर पोखरामा हनिमुन मनाउन वाध्य भएका थिए ।
अब भने श्रीमतीसँग अमेरिका जाने योजना हमालको पूरा भएको छ । उनी आज श्रीमती मधु भट्टराईलाई लिएर अमेरिकातर्फ लागेका छन् । हमाल करिब १० दिनजती अमेरिकामा रहने वुझिन्छ ।
हमालले पनि आफ्नो फेसबुक मार्फत श्रीमती मधुको साथमा अमेरिकातर्फ जान लागेको लेखेका छन् । उनले अमेरिकामा रहँदा आफ्ना आफन्त, दिदी र बहिनीलाई समेत भेट्ने लेखेका छन् ।
नेपाली फिल्ममा सक्रिय हुन छाडेपछि हमाल महोत्सव र विदेशमा आयोजना हुने कार्यक्रममा नै धेरै पुगेको देखिन्छ । उनी अमेरिकामा आयोजना हुने एनआरएन सम्मेलनमा सहभागी हुनेछन् ।
