अभिनेत्री प्रियंका कार्की सोमबार बेलुकी काठमाण्डौको याक एन्ड यती होटलमा आयोजना भएको एक कार्यक्रममा मस्तले नाचिन् । बलिउड वादशाह शाहरूख खानको उपस्थितीमा आयोजना भएको कान्साई नेरोल्याक पेन्ट्सको एक कार्यक्रममा प्रियंकाले हिन्दी गीतमा नृत्य गरिन् ।
प्रियंकाले शाहरूख खान अभिनित फिल्मका गीतमा नृत्य गरेपछि अहिले आलोचना भैरहेको छ । एक नेपाली अभिनेत्रीले नेपाली फिल्मका गीतमा नृत्य नगरेर हिन्दी गीतमा नाच्नुलाई केहीले गलत पनि भनेका छन् । तर, प्रियंकाले भने आफूले नेपाली गीतमा नृत्य गर्न चाहेपनि सबै गीतको लेआउट भारतबाटै आएको बताएकी छिन् ।
प्रियंकाले कार्यक्रम आयोजकदेखि, डीजे अनि कार्यक्रम संचालक नै भारतीय रहेको बताएकी छिन् । पूरै टिम नै भारतीय भएकाले पनि आफ्नो कुरा सुन्ने कोही नभएको उनले फेसबुक मार्फत जनाएकी छिन् ।
प्रियंकाले आफ्नो लागि यो ठूलो अवसर भएकाले समातेको लेखेकी छिन् । उनले नाचमा कसैको भाषा नहुने भएकाले पनि आफूले हिन्दी गीतमा नृत्य गरेको बताइन् ।
शाहरूख खानले आफ्नो प्रस्तुती राखेपछि प्रियंकाले हिन्दी गीतमा नृत्य गरेकी थिइन् । तर, दुबै कलाकारले एक साथ स्टेज शेयर भने गरेनन् ।
