स्काउटको विषयमा फिल्म 'स्काउट' बन्ने भएको छ । आज काठमाण्डौमा एक कार्यक्रमको आयोजना गर्दै यो फिल्मको शुभसाइत गरिएको हो ।
सूचना तथा संचारमन्त्री मिनेन्द्र रिजालको साथमा सभासद तथा विभिन्न नेताहरुको उपस्थितीमा फिल्मको मुहुर्त गरिएको हो । फिल्ममा गरिमा पन्त र कुशल थापाको मुख्य भूमिका रहनेछ । यो फिल्मलाई गोविन्द गौतमले निर्देशन गर्न लागेका हुन् ।
मधुकुमार श्रेष्ठको प्रस्तुती रहेको यो फिल्ममा केदार पराजुली र ईश्वर तिवारी निर्माताको रुपमा छन् । प्रस्तुतकर्ता मधुकुमार श्रेष्ठले स्काउट विश्वमै एक चर्चित र पवित्र संस्था भएकाले यसको कथामा फिल्म बनाउँदा सकारात्मक सन्देश दिने भएकाले बनाउन लागेको बताए ।
कार्यक्रममा निर्माता संघका अध्यक्ष राजकुमार राई, वितरक प्रदिप उदय लगायतले फिल्मलाई शुभकामना दिएका थिए । मधुले यसअघि 'बजार', 'विन्दास' र 'विन्दास २' फिल्म बनाएका थिए ।
