वितरक तथा निर्माता गोपाल कायस्थले बनाउन लागेको फिल्म `लुटेरा`का निर्देशक फेरिएका छन् । कलाकारदेखि कथावस्तु समेत फेरिएको यो फिल्मको अन्तिम क्षणमा आएर निर्देशन नै फेरिएका हुन् ।
सुरुवातमा अभिनेता निखिल उप्रेतीलाई लिएर कायस्थले फिल्म बनाउने बताएका थिए । यसको निर्देशन सविर श्रेष्ठले गर्ने पक्का भएको थियो । अभिनेत्री रेखा थापा समेतले काम गर्ने भएपछि कथावस्तु फेरबदल गरिएको थियो । निखिल र रेखाले ८ बर्षपछि एकसाथ काम गर्न लागेपछि कायस्थ पनि दंग थिए ।
तर, फिल्मको निर्देशक नै परिवर्तन भएपछि कायस्थ नायिकाको खोजीमा पनि लागेका छन् । उनले फिल्ममा रेखा थापाले आइटम डान्स मात्र गर्ने जानकारी दिएका छन् । आपसी समझदारीमा नै सविर श्रेष्ठले छाडेको कायस्थको भनाई छ ।
सबिर 'राम प्यारी' फिल्ममा व्यस्त हुने भएकाले सहमतीमा छोडेको निर्माता कायस्थले बताए । अब यो फिल्मलाई दयाराम दाहालले निर्देशन गर्ने छन् । माघ महिनाबाट नै सुरु हुने भनिएपनि कलाकार र निर्देशकको फेरबदलका कारण यो फिल्मको छायांकन सुरु हुन सकेको छैन ।
