पौष २५ गतेबाट अभिनेत्री रेखा थापाको द्धन्द्धात्मक भूमिका रहेको फिल्म `तथास्तु` प्रदर्शनमा आउँदैछ । यो फिल्मको कथा निर्देशक सविर श्रेष्ठले रेखालाई नै हेरेर लेखिएको बताएका छन् ।
सविरले भने– 'यो फिल्ममा कथा लेखेपछि रेखालाई पक्का गरिएको होइन, रेखालाई हेरेर नै लेखिएको हो ।' सविरले रेखा थापा नेपाली फिल्मको एक स्टार भएकाले उनको माग आफूहरुले महशुस गरेको खुलाए ।
सविरका अनुसार कुनै पनि कलाकार ब्रान्ड बनेपछि मात्र उसको अनुहार हेरेर कथा लेखिन्छ, रेखा त्यही स्थानमा छिन् । अभिनेत्री थापाले पनि फिल्ममा आफूले नारी प्रधान भूमिका निर्वाह गरेको बताइन् ।
सुवास थापा, विज्ञान जोशी लगायतका कलाकारले समेत काम गरेको यो फिल्मलाई रामहरी धितालले निर्माण गरेका हुन् । फिल्ममा बसन्त सापकोटाको संगीत छ ।
अभिनेत्री थापासँग सविरले काम गरेका दुई फिल्म 'कसले चोर्यो मेरो मन', 'काली' हिट छन् । 'तथास्तु' पनि यही सूचीमा पर्ने दाबी रेखा र सविरको छ ।
