कात्तिक ३ गते हडकडमा आयोजना भएको सातौं नेफ्टा फिल्म अवार्डको आयोजक नेपाल चलचित्र प्राविधिक संघले अवार्ड विजेता फिल्मीकर्मीलाई प्रमाणपत्र वितरण गर्दै अवार्डको विसर्जन भएको घोषणा गरेको छ । यो अवार्डको सम्पूर्ण कार्य सकिएको र अब आठौं संस्करणको काम शुरू गरिने आयोजकले जानकारी गरायो ।
सूचना तथा संचारमन्त्री मिनेन्द्र रिजालको प्रमुख आतिथ्यमा सम्पन्न भएको यो कार्यक्रममा विभिन्न ३२ विधामा अवार्ड जित्ने कलाकार, अवार्डलाई सफल बनाउन साथ दिने पत्रकार र फिल्मीकर्मीलाई प्रमाणपत्र वितरण गरिएको थियो । कार्यक्रममा नेपाल विज्ञापन संघका नव नियुक्त पदाधिकारीलाई स्वागत पनि गरिएको थियो ।
नेपाल चलचित्र प्राविधिक संघका अध्यक्ष मनोज केसीले अवार्ड दु:ख सुखका साथ गरेपनि सफल बनाएको दाबी गरे । उनले आठौं अवार्डका लागि चैत्रको अन्तिम साताबाट फिल्म हेर्ने काम शुरू हुने बताए ।
नेपालबाट सम्पूर्ण अवार्ड आयोजनाको जिम्मा लिएका निर्माता सुनिल कुमार थापाले अवार्ड कार्यक्रम सफल हुनु र फिल्म क्षेत्रले एक पाइला फड्को मार्नु नै ठूलो कुरा भएको बताए ।
कार्यक्रममा नेपाली फिल्मका कलाकार, प्राविधिक तथा पत्रकारहरुको उपस्थिती थियो । नेफ्टाले आठौं अवार्ड अर्को बर्षको सुरुवातमा नै गर्ने जनाएको छ । महासचिव अनन्त तिमिल्सिनाले कार्यक्रममा स्वागत मन्तव्य राख्दै नेफ्टाले चुनौती सामना गर्दै अगाडि बढेको बताएका थिए ।
