भारतीय चर्चित कमेडियन कपिल शर्माको शनिबार दशरथ रंगशालामा हुने पर्पलफेष्ट कार्यक्रम स्थगित हुने भएको छ । कार्यक्रमको अघिल्लो दिन साँझ सुरक्षाको कारण देखाउँदै जिल्ला प्रशासन कार्यालय काठमाडौंले कार्यक्रम स्थगित गर्न आदेश दिएको छ ।
सुरक्षा समितिको बैठकले मुलुकको सुरक्षा संवेदनशील भएको भन्दै माघ ८ पछि मात्र कार्यक्रम गर्न आयोजक एनसेललाई आदेश दिएको छ । काठमाडौंका प्रमुख जिल्ला अधिकारी एकनारायण अर्यालले सुरक्षाको कारण देखाउँदै कार्यक्रम स्थगित गर्न आदेश दिएको बताएका छन् ।
कार्यक्रमका लागि करिब १३ हजार टिकट बिक्री भईसकेको आयोजकले जानकारी दिएको छ । लिखित पत्र नआएकाले एनसेलले कार्यक्रमको बारेमा आफ्नो अधिकारिक धारणा राखेको छैन ।
कार्यक्रममा कपिलसँगै भारतीय चर्चित गायक सोनु निगम र नेपाली कलाकारहरु जितु नेपाल, विल्सन विक्रम राई, सुगम पोखरेललगायतले स्टेज तताउने तयारी गरेका थिए ।
