निर्माता नारायण खतिवडा मृत फेला परेका छन् । राजधानीको बागबजारस्थित होटल हार्दिकको कोठा नं. १०३ मा उनी मृत भेटिएका हुन् ।
मंगलबार दिउँसो होटलमा आएका खतिवडा बुधबार दिउँसो करिब साढे ३ बजेतिर नग्न अवस्थामा मृत अवस्थामा भेटिएका हुन् । बुधबार बिहानैबाट उनी बसेको कोठाको ढोका नखुलेपछि शंका लागेर हेर्दा उनी मृत भेटिएको होटलले जनाएको छ ।
खतिवडाको शवलाई पोस्टमार्टमका लागि टिचिङ अस्पताल लगिएको छ । प्रहरीका अनुसार भोली बिहान खतिवडाको पोस्टमार्टम हुनेछ । अत्याधिक मदिरा सेवनका कारण खतिवडाको निधन भएको बुझ्नमा आएपनि प्रहरीले निधन हुनुको कारण पोष्टमार्टमपछि थाहा हुने बताएको छ ।
चितवनका स्थाई वासिन्दा खतिवडाले ‘भेटी’ र ‘लफडा’ नामका फिल्म निर्माण गरिसकेका छन् भने ‘मेरो मान्छे’ उनको पछिल्लो फिल्म हो । यो फिल्मको हाल पोस्टप्रोडक्सनको काम भईरहेको छ ।
