गिनिज बुक अफ वर्ल्ड रेकर्डसमा नाम लेखाउन नेपालका आठ बर्षे बालकले फिल्म निर्देशन गरेका छन् । पत्याउनै नसक्ने बिलक्षण प्रतिभा भएका सौगात बिष्टले 'लभ यू बाबा' नामक फिल्म निर्देशन गरेका हुन् ।
पत्याउनै गार्हो भएपनि सौगातले फिल्म निर्देशन गरेर चमत्कारी देखाएका छन् । उनले निर्देशन गर्दै गरेको मेकिङ भिडियो सार्वजनिक गरिएको छ । उक्त भिडियोमा सौगातको निर्देशन गर्ने शैली र कमाण्डिङ क्षमता देख्न सकिन्छ ।
फिल्म ‘लभ यू बाबा’ ले एउटी छोरीलाई आमाको अभाव हुन नदिन बाबुले गरेको संघर्ष र प्रेमलाई प्रस्तुत गरिएको छ । फिल्मको शिर्ष भूमिकामा अभिनेता गजित विष्ट र संगम विष्ट छन् । निश्मा घिमिरे, अशिष्मा नकर्मी, बसन्त भट्ट, निर्मल शर्मा लगायतका कलाकारहरुको समेत अभिनय रहेको यो फिल्मलाई सम्झना पोख्रेलले निर्माण गरेकी हुन् ।
अभिनेता गजितको कथामा तयार गरिएको फिल्म ‘लभ यू बाबा’ मा गम्भिर विष्टको पटकथा तथा संबाद र दिव्यराज सुबेदीको छायांकन रहेको छ । ‘लभ यू बाबा’ आउँदो मंसिर २६ गतेदेखि देशव्यापी रुपमा प्रदशर्नमा आउँदैछ ।
