फिल्म 'बाटो मुनिको फूल' हिट भएपछि निर्माता तथा गायक यश कुमार यसको सिक्वेल बनाउन तम्सिएका छन् । उनले बनाउन लागेको यसको सिक्वेल `बाटो मुनिको फूल २`को छायांकन माघ १८ बाट सुरु हुँदैछ । यो फिल्मलाई सुवर्ण थापाले निर्देशन गर्दैछन् ।
यसअघि 'बाटो मुनिको फूल'लाई सुरज सुब्बा नाल्बोले निर्देशन गरेका थिए । गायक तथा कलाकार यश कुमारले नाल्बोको समय नमिलेकाले काम गर्न नसकेको बताए । फिल्मका कलाकारका रुपमा बाबु बोगटी, यश कुमार, ऋचा शर्मा, रिमा विश्वकर्मा र अशिष्मा नकर्मी मात्र पक्का भएका छन् । अन्य मुख्य भूमिकामा काम गर्ने कलाकार तय नभैसकेको यश कुमारले बताए ।
यशका अनुसार, अन्य कलाकार पक्का भएपछि मात्र सार्वजनिक रुपमै फिल्मको घोषणा हुनेछ । कलाकार धेरै भएकाले पनि सबैको समय मिलाउन गाह्रो भएको यशको भनाई छ । 'बाटो मुनिको फूल'का मुख्य कलाकार रेखा थापा र नन्दिता केसी यसको सिक्वेलमा देखिने छैनन् । फिल्ममा यश कुमार आफैले संगीत दिएका छन् ।
