सफलता टाउको ठोकेर पाइने चिज होइन । सफलता पाउन मिहिनेत, संघर्षसँगै भाग्य पनि आवश्यक छ । नेपाली फिल्म क्षेत्रमा दर्जन फिल्म खेलेर पनि नचिनिएका थुप्रै अनुहार छन् । तर केही यस्ता कलाकार पनि छन् जो थोरै फिल्म गर्दा स्टार भैसक्छन् ।
यतिबेला अभिनेता अनमोल केसीलाई फिल्म क्षेत्रको नयाँ स्टारको रुपमा हेर्न थालिएको छ । फिल्म 'होस्टेल' र 'जेरी' सफल भएसँगै अनमोल अबको स्टार भन्नेहरुको संख्या थपिएको छ ।
अनमोलले अभिनय गरेको 'जेरी' यतिबेला हलमा लागिरहेको छ । फिल्म हेरेर उनको फ्यान संख्या एकाएक बढेको छ । केहि दिनअघि त उनलाई भेट्न यूवती फ्यानहरु घरको गेटमै पुगेको समाचार बाहिर आएको थियो ।
अनमोलको लुक्स र अभिनयले यतिबेला धेरैलाई आकर्षण गरेको छ । नेपाली फिल्म क्षेत्रमा खड्किएको स्टारको अभाव अनमोलले पूर्ती गर्ने आश पनि गर्न थालिएको छ ।
अभिनेता भुवन केसीले कमाएको र जमाएको नामलाई धान्नु मात्र होइन, आफूलाई समेत स्थापित गर्नु अनमोलका चुनौती हुन् । २ वटा फिल्मले नै पाएको सफलताले अनमोलको त्यो छनक देखिन्छ । यो स्टारडमलाई कायम राख्नका लागि पनि उनलाई ठूलै चुनौती भने देखिन्छ ।