जसले हिरो बनाए आज उनी आफ्नै सामु छैनन् तर उनका यादलाई बिर्सन कहाँ सकिन्छ र ? हो, स्वर्गीय निर्देशक आलोक नेम्वाङलाई सम्झिदै अभिनेता समेत रहेका निर्देशक सुदर्शन थापाले नयाँ फिल्म निर्देशनको घोषणा गरेका छन् ।
'चंखे शंखे पंखे' नाममा सुदर्शनले छैठौं फिल्म निर्देशनको घोषणा गरे । मंगलबार राजधानीमा एक औपचारिक कार्यक्रमका बिच सुदर्शनले आफ्नै मुख्य भूमिका रहने फिल्म निर्देशनको घोषणा गरेका हुन् । फिल्ममा सुदर्शन 'शंखे'को भूमिकामा देखिने छन् । आलोकले निर्देशन गरेको 'अझै पनि'बाट सुदर्शन अभिनेताको रूपमा पनि आउँदैछन् । यो फिल्म आउँदो फाल्गुन १५ देखि प्रर्दशन हुँदैछ ।
कमेडी र राष्ट्र प्रेम झल्कने 'चंखे शंखे पंखे'मा चंखेको भूमिकामा सुवास थापा र शंखेको भूमिकामा नव कलाकार प्रेम पुरी देखिनेछन् । यस्तै फिल्ममा पूजा शर्मा, नन्दिता केसी, प्रमोद अग्रहरी, राजाराम पौडेल, श्याम राई, ध्रुव कोइराला र रबिन्द्र खड्काको पनि मुख्य भूमिका रहने छ ।
यहि बिहीवारदेखि छायाँकन सुरु हुने फिल्मलाई राजेश श्रेष्ठले खिच्नेछन् । संगीतकार तारा प्रकाश लिम्बुको ३ वटा गीत रहने यो फिल्ममा गोविन्द राईले नृत्य निर्देशन गर्दैछन् भने द्धन्द अष्ट महर्जनको रहनेछ । करिब ८० लाखको बजेटमा निर्माण हुन लागेको यो फिल्मलाई नयाँ निर्माता सन्तोष सेन ठकुरीले निर्माण गर्नेछन् ।
३ बेरोजगार यूवाको कथामा बन्न लागेको यो फिल्मले आत्महत्याको बिषयलाई पनि उठान गर्ने जानकारी निर्माणपक्षले दिएको छ । कार्यक्रममा बोल्दै निर्देशक तथा कलाकार सुदर्शन थापाले नेपालमा बढ्दै गएको आत्महत्याको कथालाई फिल्ममा देखाउने बताए । फिल्मको कथा रामशरण पाठकले लेखेका हुन् ।
