बलिउडका बीग बी मानिने अभिनेता अमिताभ बच्चनले अर्का अभिनेता शाहरूख खानसँग माफी मागेका छन् । शाहरूखसँग अमिताभले माफी माग्नुको कारण आफ्नै पत्नी जया बच्चनले गरेको एक टिप्पणी थियो ।
जयाले शाहरूख खानको फिल्म ‘ह्याप्पी न्यू इयर’लाई यो बर्षकै मुर्ख फिल्म भनेकी थिइन् । शाहरूखसँग जयाले यसो भन्दासम्म ठिकै थियो । तर, जब जयाले सार्वजनिक कार्यक्रममै ‘ह्याप्पी न्यू इयर’लाई वकवास फिल्म भनिन्, यसपछि चर्चा चुलियो ।
जयाले दिएको यो अभिव्यक्तिका बारेमा शाहरूखले अहिलेसम्म केही भनेका छैनन् । तर, जयाका पति अमिताभ बच्चनले भने शाहरूखलाई एसएमएस गर्दै माफी मागेका छन् । अमिताभले एसएमएसमा जयाको मनासाय शाहरूख र उनको फिल्मलाई अपमान गर्नु नरहेको लेखेका छन् ।
जयाले आफ्नो छोरा अभिषेक बच्चन भएकै कारणले ‘ह्याप्पी न्यू ईयर’ हेर्न गएको बताएकी थिइन् । यता अभिषेक र ऐश्वर्या पनि शाहरूखलाई भेटेर जयाको कुरामा माफी माग्न चाहन्थे । जसका लागि शाहरूखको घर मन्नत गएको यो जोडीलाई गौरीले स्वागत गरेकी थिइन् । शाहरूखले भने ऐश्वर्या र अभिषेकसँग भेट पनि गरेनन् ।
शाहरूख बच्चन परिवारसँग निक्कै नजिक छन । शाहरूखको अभिनय तथा लगानी रहेको ‘ह्याप्पी न्यू इयर’ले विश्व बजारमा करिब ३ सय ४४ करोड ग्रस कलेक्शन गरिसकेको छ । भारतमा यो फिल्म २ सय करोड नजिक पुगेको छ ।
