झन्डै ६० फिल्ममा संगीत भरेका चर्चित संगीतकार, गायक तथा गीतकार चेतन सापकोटाले फिल्म निर्माण गर्ने भएका छन् । नयाँँ बर्षको शुरूवातसँगै सुटिङ गर्नेगरी चेतनले फिल्म निर्माणको घोषणा गरे ।
नाम तय नगरिएको फिल्मलाई रिलिज हुन लागेको फिल्म 'लज्जा'का निर्देशक नवल नेपालले निर्देशन गर्ने भएका छन् । चेतनको कथा तथा नवलको पटकथा र संवादमा बन्न लागेको साँगीतिक प्रेमकथानक फिल्मलाई बेल्जियमका एनआरएन सहदेव गौतमले लगानीमा साथ दिने भएका छन् ।
निर्माता छबिराज ओझालाई सल्लाहकार राखेर फिल्म निर्माण गर्न लागेको चेतनले फिल्मीखबरलाई जानकारी दिए । 'संगीत दिएको पहिलो फिल्म 'चट्टान'मा संगीतकार बनाउन छबि दाईकै हात थियो । अहिले पहिलो फिल्म निर्माण गर्न लाग्दा उहांकै सल्लाह लिएको छु', चेतनले भने ।
पूर्वेली र पश्चिमेली युवायुवतीको प्रेमकथामा बनाउन लागेको उक्त फिल्मको लागि पात्रहरू भने छनोट गर्न बाँकी रहेको चेतनले बताए । पछिल्लो रिलिज हुन लागेको 'लज्जा' फिल्ममा संगीत भरेका चेतनले आफ्नै फिल्ममा पनि संगीत दिनेछन् । अन्य प्राबिधिक छनोटको क्रममा रहेको उनको भनाइ छ ।
'लज्जा' फिल्ममा नवलको काम गर्ने शैली र क्षमताबाट प्रभावित भएकाले निर्देशनको जिम्मा उनैलाई दिएको चेतनले बताए । 'पहिलो काम उहाँसँग नै गर्ने इच्छा थियो । त्यसले नवलको विकल्प खोजिन', चेतनले भने ।