सम्पूर्ण प्रकृया पुगेको खण्डमा आगामी मंसीर २६ गते रिलिज हुन लागेको नेपाली फिल्म 'लभ यू बाबा'का निर्देशक सौगात बिष्टको नाम केहि दिनमा नै गिनिज बुक अफ द वर्ल्ड रेकर्डस्मा दर्ता हुनेछ । सौगातले सबैभन्दा कम उमेर अर्थात् ८ बर्षमै फिल्म निर्देशन गरेका हुन् ।
यिनै बाल निर्देशकको फिल्म 'लभ यू बाबा'को टिजर रिलिज भईसकेको छ । जहाँँ उनकै पिता गजित बिष्ट र दिदी संगम बिष्ट मुख्य भूमिकामा छन् । फिल्मले बाउ छोरीको प्रेमकथालाई प्रस्तुत गरेको छ । फिल्मको कथा लेखन सौगातका काका गम्भिर बिष्टको रहेको छ ।
'लभ यू बाबा'मा आमाविहीन १० वर्षीया बालिकालाई हुर्काउन एउटा बुबाले गरेको संघर्षको कथालाई प्रस्तुत गरिएको छ । फिल्ममा गजित र संगमको साथमा निश्मा घिमिरे, अशिष्मा नकर्मी, वसन्त भट्ट, निर्मल शर्मा, अनमोल अग्रवाल लगायतले अभिनय गरेका छन् ।
दिव्यराज सुवेदीको छायांकन रहेको फिल्ममा सत्य–स्वरुप आचार्य, डेनी निरौला, दीपक शर्मा र प्रदिप बास्तोलाको संगीत तथा चन्द्र पन्तको द्धन्द्ध निर्देशन रहेको छ । यो फिल्मलाई सम्झना पोखरेल र रोशनी बज्राचार्यले मिलेर निर्माण गरेका हुन् । सम्झना सौगातकी आमा हुन् ।
