फिल्मलाई कला-संस्कृति तथा पर्यटन प्रवर्द्धनको माध्यमको रुपमा लिने गरिन्छ । यसैले विश्वका धेरै देशले फिल्मलाई संस्कृति तथा पर्यटन मन्त्रालयअन्तर्गत राखेका छन् । नेपालमा भने फिल्मलाई सञ्चार मन्त्रालयले हेर्छ । जसले गर्दा राज्यले फिल्मलाई प्रचारको माध्यमको रुपमा मात्र लिएको देखिन्छ । यसैले फिल्मलाई संस्कृति मन्त्रालयमा राख्नुपर्ने माग फिल्मकर्मीहरुले गर्दै आएका छन् ।

यसबीच, अभिनेता प्रदीप खड्काले पनि फिल्मलाई सञ्चार मन्त्रालयअन्तर्गत राखिएकोमा आपत्ति जनाएका छन् । उनले मंगलबार निफको एक कार्यक्रममा फिल्मलाई संस्कृति तथा पर्यटन मन्त्रालयअन्तर्गत राख्नुपर्नेमा जोड दिए । चलचित्र विकास बोर्ड सञ्चार मन्त्रालयअन्तर्गत रहँदा राज्यले फिल्मलाई प्रोपगन्डाको रुपमा मात्र हेरिरहेको त छैन भन्ने आशंका पनि उनले व्यक्त गरेका छन् ।

उनी भन्छन्, ‘मेरो बुझाइमा फिल्म भनेको कलाको समिश्रण नै हो । फिल्ममा साहित्यका विभिन्न विधाहरु पर्छन् । कथा लेखनदेखि अभिनयसम्म पर्छ । फिल्ममा कलाको समिश्रण पनि छ र पर्यटन प्रवर्द्धनमा पनि ठूलो भूमिका खेलेको छ । तर, फिल्म चाहिँ गएर बसेको छ सञ्चार मन्त्रालयअन्तर्गत । फिल्म सञ्चारको माध्यम बढी हो या कला-संस्कृति र पर्यटनको हो भन्नेमा मलाई जिज्ञासा छ ।’

पर्यटन मन्त्रालय संलग्न हुँदा फिल्मबाट नेपालको सौन्दर्यलाई प्रचार गर्न सकिने प्रदीपको बुझाई छ । ‘सञ्चार मन्त्रालयअन्तर्गत हुँदा फिल्मलाई कतै प्रोपगन्डाको रुपमा मात्र हेरियो कि ! संस्कृति मन्त्रालयअन्तर्गत हुँदा फिल्मलाई कला प्रवर्द्धन गर्ने माध्यमको रुपमा हेरिन्थ्यो कि,’ उनी भन्छन्, ‘पर्यटन तथा संस्कृति मन्त्रालय जोडिँदा फिल्मबाट हामीले नेपालको सौन्दर्यलाई प्रचार गर्न सक्छौं कि !’