.jpg)
आलिया भट्ट, वरुण धवन, सोनाक्षी सिन्हा, माधुरी दीक्षित, सञ्जय दत्त र आदित्य रोय कपूरजस्ता सुपरस्टार कास्टबाट सजिएको फिल्म ‘कलंक’ ले ओपनिङ डेमा बक्सअफिसमा धूम मच्चाएको छ । यो फिल्मले रिलिजको पहिलो दिन नै बक्सअफिसमा बाँकी फिल्मको रेकर्ड ब्रेक गरेको छ । बुधवार रिलिज भएको यो फिल्म वर्ष २०१९ को सबैभन्दा ठूलो ओपनर बनेको छ ।
यसले पहिलो दिन नै २१ करोड ६० लाखको कलेक्सन गरेको छ । ट्रेड एनालिस्ट तरण आदर्शले सोसल मिडियामा फिल्मको फर्स्ट डे बक्सअफिस कलेक्सन सेयर गरेका छन् । यसले ओपनिङ कलेक्सनमा अक्षय कुमारको फिल्म 'केसरी' (२१.०६ करोड), रणवीर-आलियाको फिल्म 'गल्ली ब्वाई' (१९.४० करोड) र र अजय देवगनको फिल्म 'टोटल धमाल' (१६.५० करोड) लाई उछिनेको छ ।
यो फिल्म वरुण धवन र आलिया भट्टको अहिलेसम्मको करिअरको सबैभन्दा ठूलो ओपनर बनेको छ । यसअघि दुईको फिल्मले पहिलो दिन यति व्यापार गर्न सकेको थिएन । ठूलो बजेटमा बनेको यो फिल्मबाट दर्शकमा ठूलो अपेक्षा थियो । तर, यो फिल्मलाई न दर्शकले रुचाएका छन् न त क्रिटिक्सको रिभ्यू र रेटिङ नै राम्रो आएको छ । भारतमा मात्र फिल्म ४ हजार स्क्रिनमा रिलिज भएको छ ।
फिल्म बुधवार महावीर जयन्तीको विदामा रिलिज भएको हो । योसँगै शुक्रवार भारतमा गुड फ्राइडेको पनि छुट्टी छ । ओपनिङसँगै फिल्मलाई दुई छुट्टी मिलेको छ । छुट्टीको फाइदा यो फिल्मले राम्रो उठाउने अनुमान गरिएको छ । यो एक पिरियड ड्रामा फिल्म हो, जुन १९४० को ब्याकड्रपमा बनाइएको छ । करण जोहर निर्मित यसका निर्देशक अभिषेक वर्मन हुन् ।
