नेपाली फिल्ममा केही समययता नयाँ अभिनेत्रीहरुको प्रवेश निकै बढेको छ । वर्षमा सरदर सयको आसपासमा फिल्म बन्दछन्, त्यसमध्ये ७० भन्दा बढी फिल्ममा हिरोइन नयाँ हुने गरेका छन् । केही वर्ष अगाडिसम्म नेपाली फिल्ममा सुरक्षित करिअर नहुने सोचाइले खासै नयाँ अनुहारको प्रवेश हुँदैन थियो । बिस्तारै पढेलेखेका र सम्पन्न परिवारमा हुर्किएका युवतीहरुको प्रवेश बढ्न थालेपछि अहिले नेपाली फिल्ममा नयाँ अनुहारको कमी छैन ।
.jpg)
.jpg)
.jpg)
(1).jpg)
तर, एकाध नवआगन्तुक कलाकारले मात्र नेपाली फिल्ममा आफ्नो गतिलो छाप छाड्न सकेका छन् । अधिकांश त पहिलो फिल्मबाटै रिजेक्ट हुन्छन् । पहिलो फिल्मबाट सफलता हात नपरे वा कामको प्रशंसा नभए दोस्रो फिल्ममा चान्स पाउन अभिनेत्रीहरुलाई ज्यादै गाह्रो हुन्छ । यसकारण पनि पहिलो फिल्ममै जबरजस्त काम देखाउन अत्यन्त आवश्यक हुन्छ । त्यसका लागि अभिनय गर्ने रहर होइन, अभिनय गर्ने जुनुन हुनुपर्छ ।
पहिलो फिल्मबाटै राम्रो सम्भावना देखाउने अभिनेत्रीहरुको लिस्ट अहिले लामै छ । उपासना सिंह ठकुरी र निरिषा बस्नेतलाई ताजा उदाहरुणको रुपमा लिन सकिन्छ । उपासनाले 'क्याप्टेन' र निरिषाले 'जानी नजानी' मा गरेको कामको निकै तारिफ भयो । नेपाली फिल्ममा उनीहरुको भविष्य राम्रो हुने अपेक्षा धेरैको छ । केहीलाई भने फिल्म रिलिज अगावै सम्भावना बोकेकी अभिनेत्रीको रुपमा हेर्न थालिएको छ । त्यसमध्येकी एक हुन् मलिका महत ।
उनको डेब्यू फिल्म 'यात्रा' यही चैत २९ मा रिलिज हुँदैछ । यसमा उनी अभिनेता सलिनमान बनियाको अपोजिटमा छिन् । फिल्ममा उनले दृष्टिविहीन युवतीको भूमिका निभाएकी छन् । उनले फिल्मको गीतमा दिएको 'एक्सप्रेसन' र ट्रेलरमा देखाएको कामले धेरैको ध्यान खिचेको छ । उनको सुन्दरताको पनि निकै प्रशंसा भइसकेको छ । अब फिल्ममा उनको काम हेर्न धेरै आतुर छन् । उनी डेब्यू फिल्मबाट निकै आशावादी रहेको बताउँछिन् ।
इन्स्टाग्राममा साझेदार गरेको फोटो हेरेपछि उनलाई निर्देशक सम्राट शाक्यले यो फिल्म अप्रोच गरेका थिए । उनी वानलाइन स्टोरी सुनेपछि फिल्म गर्न राजी भएकी थिइन् । तर, दृष्टिविहीनको भूमिका गर्न उनलाई सहज थिएन । एक भेटमा उनले भनिन्, 'फिल्म गर्ने फाइनल भएपछि मनमा डर र उत्साह दुबै थियो । दृष्टिविहीनको भूमिका न्यायपूर्वक निभाउन सक्छु कि सक्दिन भन्ने ठूलो चुनौती थियो । तर, टिमको सहयोगले मैले सोचेजस्तो गाह्रो भएन ।'
.jpg)
.jpg)
.jpg)
.jpg)
सोलुखुम्बुको एक गाउँमा टुंगना बजाएर मनको पीडा पोख्ने दृष्टिविहीन युवती तपस्याको भूमिका निभाएकी उनले टुंगना बजाउन तीन महिना तालिम समेत लिएकी थिइन् । उनले यसलाई आफ्नो नयाँ अनुभवको रुपमा लिएकी छन् । उनी 'यात्रा' मा नै आफ्नो फिल्म करिअर अडिएको बताउँछिन् । 'यो फिल्म गरेपछि केही फिल्मबाट अफर नआएका होइनन् । तर, म 'यात्रा' को नतिजाको पखाईमा छु । दर्शकबाट माया पाउनेमा आशावादी छु', उनले भनिन् ।
तश्बिर : विवेक बस्याल
