साउथ फिल्ममा प्रायः अधिकांश हिरोहरुलाई 'सुपरस्टार', 'मेगास्टार', 'स्टाइलिस्ट स्टार', 'रकिङ स्टार' जस्ता विभिन्न उपमा दिइएको हुन्छ । यो ट्रेन्ड अब नेपाली फिल्ममा पनि सुरु भएको छ । हालै फिल्म 'ए मेरो हजुर ३' को टिजरमा निर्देशक झरना थापाले पहिलो पटक अभिनेता अनमोल केसीलाई 'मेगास्टार' को उपमा दिएकी थिइन् ।
यसबीच 'भर्सटायल' अभिनेता दयाहाङ राईलाई पनि फिल्म ‘आप्पा’ टिमले ‘सुपरस्टार’ को उपमा दिएको छ । सोमवार युट्युबमा सार्वजनिक गरिएको 'साँझ परेपछि' गीतमा उनलाई ‘सुपरस्टार’ को उपमाले सम्बोधन गरिएको छ । सार्वजनिक गीतमा मुख्य कलाकार सिद्धान्त राज तामाङ र अल्लोना काबो लेप्चालाई फिचर्ड गरिएको छ ।
निर्देशक अनमोल गुरुङको शब्द तथा संगीत रहेको गीतमा निर्देशक गुरुङ र स्नेहश्री थापाको स्वर छ । जेठ २४ गतेबाट प्रदर्शनमा आउने फिल्मले बाबु-छोराको सम्बन्धको कथा भन्छ । फिल्मलाई अनमोल गुरुङले निर्देशन गरेका हुन् । यो अनमोलको डेब्यू निर्देशकीय फिल्म हो ।
माउन्टेन स्टोरीज प्रोडक्सन र सिनेमा आर्टको संयुक्त ब्यानरमा निर्माण भएको फिल्मका कार्यकारी निर्माता माबो हाङ हुन् । ‘आप्पा’ मा रुदेन सादा लेप्चाको लगानी रहेको छ । यसमा बरिष्ठ निर्देशक तथा निर्माता तुलसी घिमिरे, अरुणा कार्कीलगायतका कलाकारहरुको पनि अभिनय छ ।
‘आप्पा’ मा निर्देशक अनमोल गुरुङको कथा छ भने उनलाई पटकथा तया संवाद लेखनमा उमेश उपमाले सघाएका छन् । शैलेन्द्र डि कार्कीको छायांकन, अनमोल गुरुङ र शैकात देवको संगीत, निमेष श्रेष्ठको सम्पादन फिल्ममा छ । फिल्मको अधिकांश छायांकन भारतको कालेबुङमा भएको हो ।
गीत हेर्नुहोस् :-
