.jpg)
सुदर्शन थापाको निर्देशनमा बन्न लागेको फिल्म ‘सम्हालिन्छ कहिले मन’ को छायांकन बेलायतको राजधानी लण्डनमा सुरु भएको छ । फिल्मको छायांकनका लागि केही दिन अगाडि कलाकार र निर्माण टिम लण्डन पुगेको थियो । लण्डनमै करिब ५० दिनको फिल्मको छायांकन चल्नेछ ।
.jpg)
छायांकन आरम्भ गर्नुभन्दा अगाडि फिल्मका कलाकार र टिमले क्यामेरा पुजा गरेका थिए । पुजापश्चात् नायिका पूजा शर्मा र नव–नायक सोनम तोप्देनले पहिलो सर्ट दिएका छन् । फिल्ममा आकाश श्रेष्ठ, सरोज खनाल, गौरी मल्ल, धिरेन शाक्य लगायतका कलाकारको पनि मुख्य भूमिका छ ।
.jpg)
निर्देशक थापाले लण्डन, स्कटल्याण्ड र वेल्समा फिल्मको छायांकन हुने बताए । एबी इन्टरनेशलको ब्यानरमा निर्माण हुन लागेको फिल्मको छायांकन बेलायतपछि नेपालको मुस्ताङमा हुनेछ । अमित बस्नेतको लगानी रहेको फिल्मका कार्यकारी निर्माता अंकित गौतम र सनिष खकुरेल हुन् ।
.jpg)
त्रिकोणात्मक प्रेमकथामा आधारित भएर बन्ने फिल्ममा परि राना र अजितकुमार थापाको सह–निर्माण छ । अर्जुन पोखरेल र ताराप्रकाश लिम्बुको संगीत, सौरभ लामाको छायांकन, कविराज गहतराजको कोरियोग्राफी रहेको चलचित्रमा महेश दवाडीको कथा छ ।
