सम्भवतः घोषणा गरिएको २४ घण्टामा रिलिज डेट पोस्टपोन्ड हुने पहिलो फिल्मको रेकर्ड फिल्म ‘लभ स्टेशन’ ले बनाएको छ । गएको बुधबार बिहान फिल्मको रिलिज डेट निर्माता गोविन्द शाहीले चैत १ गतेलाई कन्फर्म गरेका थिए । तर, बिहीवार साँझ नै फिल्मको रिलिज पोस्टपोन्ड भएको छ ।
उक्त डेटमा क्यूएफएक्सका मालिका नकिम उद्दिनले निर्माण गरेको फिल्म ‘द म्यान फ्रम काठमाडौं’ आउने भएपछि ‘लभ स्टेशन’ ब्याक हटेको हो । निर्माता शाहीले भने फिल्मको रिलिज डेट पोस्टपोन्ड भएको विषयमा बोल्न चाहेनन् । भन्छन्, ‘केही दिन प्रतिक्षा गर्नुस् ।’
 (1)(1).jpg)
यो फिल्मको वितरणको जिम्मा पाएका मनोज राठीले भने फिल्म घोषित मितिमा नआउने बताए । उनले फिल्मीखबरसँग कुराकानी गर्दै भने, ‘फिल्म सर्ने त कन्फर्म हो । अहिले नयाँ डेटको विषयमा छलफल भइरहेको छ ।’ स्रोतका अनुसार, फिल्म चैत ८ मा आउने प्रवल सम्भावना छ ।
फागु पूर्णिमाको बिदा कब्जा गर्ने रणनीति भएपनि देशको सबैभन्दा ठूलो मल्टिप्लेक्स क्यूएफएक्सको फिल्म रिलिज हुने भएपछि निर्माता शाही पछाडि हट्न बाध्य भएका हुन् । उनी तत्काल फिल्मको रिलिज पोस्टपोन्ड भएको जानकारी दिँदा सकारात्मक सन्देश प्रवाह नहुने देखेर मौन छन् ।
‘लभ स्टेशन’ लाई भेट्रान निर्देशक उज्जवल घिमिरेले निर्देशन गरेका हुन् । यो फिल्मको अझै दुई गीत खिच्न बाँकी छ । फिल्ममा युवा स्टार प्रदीप खड्का र अभिनेत्री जसिता गुरुङ लिड रोलमा छन् । सांगीतिक प्रेमकथामा आधारित पारिवारिक फिल्म बताइएको यसमा प्रदीप गायकको भूमिकामा छन् ।
