गीतसंगीत र ट्रेलरका कारण दर्शकमाझ प्रतिक्षीत बनेको फिल्म ‘प्रसाद’ ले शुक्रवारबाट प्रदर्शन आरम्भ गरेको छ । एकल रिलिज पाएको फिल्मले बुधबार राजधानीमा भएको प्रिमियरमा उत्कृष्ट प्रतिक्रिया पाएको थियो । अब दर्शक प्रतिक्रियाले फिल्म लामो रेसको घोडा बन्ने वा नबन्ने निर्धारण गर्नेछ ।
'नोभेम्बर रेन', 'क्लासिक' लगायतका लभस्टोरी फिल्म निर्देशन गरिसकेका दिनेश राउत यस फिल्मका निर्देशक हुन् । विचार भन्नका लागि फिल्म बनाएको बताउँदै आएका उनले पहिलो पटक संवेदनशिल विषय उठाउने प्रयास गरेका छन् । प्रिमियरमा उनको कामको प्रशंसा भएको थियो । यसको कथा पत्रकार सुशील पौडेलले लेखेका हुन् ।
अन्तरजातिय विवाह गरेर राजधानी छिरेको जोडीको जीवनमा सन्तान नहुँदा आउने उचारचढावको कथा फिल्मले भन्छ । उम्दा कलाकार विपिन कार्की, नम्रता श्रेष्ठ र निश्चल बस्नेत फिल्मको केन्द्रिय भूमिकामा छन् । विपिन र नम्रता श्रीमान् श्रीमतीको भूमिकामा छन् भने निश्चल नेगेटिभ रोलमा छन् ।
(1).jpg)
७० बढी सिंगल स्कृन पाएको फिल्मले मल्टिप्लेक्समा पनि उच्च सोज हात पारेको छ । निर्माताले सर्वाधिक शेयर पाउने देशको सबैभन्दा ठूलो मल्टिप्लेक्स क्यूएफएक्स च्यानलमा ‘प्रसाद’ ले राजधानीका ५ हलबाट १५ सोज र उपत्यका बाहिरका ४ हलबाट ७ सोज पाएको छ । फिल्मले क्यूएफएक्स च्यानलमा मात्र कुल २२ सोज आफ्नो पक्ष गरेको छ ।
गीतसंगीतले निर्माण गरेको हाइप र गिनेचुनेका कलाकारका कारण फिल्मलाई क्यूएफएक्सले उच्च सोज उपलब्ध गराएको हो । नेपाली फिल्म निकै कम हाउसफुल हुने ठमेलको छायाँको २ सोज, सिभिल मलको ४ सोज, कुमारीको १ सोज, लिबिमको ३ सोज र चितवनको जलमा हलमा पाएको २ सोजका सिट भरिसकेका छन् ।
बुकिङ खुलेसँगै फिल्मको टिकट तिव्र गतिमा 'सेल्स' भइरहेको छ । राजधानी तथा उपत्यकाका मल्टिप्लेक्समा पनि फिल्मले राम्रो सोज संख्या हात पारेको छ । 'छक्का पञ्जा ३' पछि खडेरी लागेको नेपाली फिल्मको व्यापार 'प्रसाद' ले चलायमान बनाउने विश्वास चलचित्रकर्मीको छ ।
सिंगल स्कृनमा एक्लै भए पनि मल्टिप्लेक्समा भने यो फिल्मसँग भिड्न अन्य दुई विदेशी फिल्म प्रदर्शनमा आएका छन् । प्रियंका चोपडाले निर्माण गरेको नेपाली भाषाको सिक्कमी फिल्म 'पाहुना' र सुशान्त सिंह राजपुत र सारा अली खानको 'केदारनाथ' एकसाथ प्रदर्शनमा आएको छ । उता गएको हप्ता आएको फिल्म '२.०' को दबदबा अझै कायमै छ ।
