अभिनेत्री प्रियंका चोपडा र सिंगर निक जोनासको विवाहमा सहभागी हुन हलिउडका चर्चित अभिनेता ड्वायन जोनसन भारत आउने भएका छन् । प्रियंका, ड्वेयनसँग पहिलो हलिउड फिल्म ‘बेवाच’ मा देखिएकी थिइन् । यसका अलावा निक पनि गएको वर्ष फिल्म ‘जुमान्जी : वेलकम टू द जंगल’ मा ड्वेयनसँग देखिएका थिए ।
ड्वेयनलाई ‘द रक’ नामबाट चिन्ने गरिन्छ । प्रियंका र निकको बिहेमा सहभागी हुन विशेष पाहुनाको रुपमा उनी आउने पक्का भएको भारतीय मिडियाले बताएका छन् । उनी बुधबार साँझसम्म मुम्बई पुग्ने खबर छ । विवाहका लागि निकका भाई जो जोनास आफ्नी श्रीमती सोफी टर्नरसँग भारत पुगिसकेका छन् ।
बुधबार साँझसम्म निकका माता पिता पनि भारत पुग्ने बताइएको छ । दीपिका पादुकोण र रणवीर सिंहको जसरी नै प्रियंका र निकको विवाह पनि दुई रितिरिवाजबाट हुनेछ । पहिला एक डिसेम्बरमा निक जोनासको धर्म अनुसार क्रिश्चियन रितिरिवाजबाट हुनेछ । यसको अर्को दिन हिन्दु रितिरिवाज अनुसार दुईले सातफेरो लिनेछन् ।
बिहेपछि ४ डिसेम्बरमा दुईले दिल्लीमा एक ग्रान्ड रिसेप्सन दिँदैछन् । प्रधानमन्त्री नरेन्द्र मोदी दिल्लीमा हुने रिसेप्सन पार्टीमा सहभागी हुनसक्ने खबर छ । तर, यस विषयको पुष्ठि भने भएको छैन । प्रियंकाभन्दा निक १० वर्ष कान्छा छन् । निक आफ्नो विवाहका लागि निकै दिन अगाडि भारत पुगिसकेका छन् ।
