माघ १८ लाई प्रदर्शन मिति घोषणा गरिएको फिल्म ‘रणवीर’ को पोस्टर सार्वजनिक भएको छ । अभिनेता सुशील सिटौलको चरित्रलाई केन्द्रित गरेर सार्वजनिक गरिएको पोस्टरमा उनी एङ्ग्री लुक्समा प्रस्तुत छन् । उनले यो फिल्मको लागि ७० केजीबाट आफ्नो तौल १५ किलो बढाएर ८५ केजी तुल्याएका थिए ।
.jpg)
करिब नौ महिना नियमित जिम गरेर आफूले तौलसँगै शारीरिक सुगठन समेत यही फिल्मको लागि बनाएको सुशीलले बताए । यो फिल्मलाई गोविन्द सिंह भण्डारीले निर्देशन गरेका हुन् । फिल्ममा उनकै कथा, पटकथा तथा संवाद छ । करीब दुई करोडको लगानीमा फिल्म निर्माण भएको बताइएको छ ।
बिष्ट थापा र दिपेन्द्र रेग्मी निर्मित लभ तथा एक्सन ड्रामा फिल्ममा सुशीलसँगै प्रशान्त ताम्राकार, शुभेच्छा खड्का, सुपुष्पा भट्ट, रवि गिरी, नरेश पौडेल लगायतका कलाकारको अभिनय रहेको छ । निर्माता द्वय थापा र रेग्मीले बिना सम्झौता फिल्म बनाएको बताएका छन् ।
‘रणवीर’ मा महेश पौडेलको छायांकन, कृष्ण भण्डारीको सम्पादन, गम्भिर बिष्ट र सुरेन्द्र बसेलको कोरियोग्राफी छ । हर्कुलस बस्नेत, सुशान्त गौतम र अमित श्रेष्ठको संगीत रहेको फिल्मले शिक्षित युवाले समाजमा गर्ने संघर्षको कथा भन्छ ।
