Nepal's No.1 Filmy Web Magazine

अभिनेता सलोन बस्नेतको पहिलो निर्माण रहेको फिल्म ‘रंगी’ अब बेलायतको राजधानी लण्डनमा प्रदर्शन हुने भएको छ । आगामी मे ९ तारिख (बैशाख २६ गते)बाट लण्डनको २७ वटा हलमा फिल्म प्रदर्शन हुन लागेको हो । महारानी प्रोडक्सनका विक्रम जोशीले फिल्मलाई लण्डनमा वितरणको जिम्मा लिएका छन् ।

निर्माणको तयारीमा रहेको फिल्म ‘महाराजधिराज’मा कलाकारको ‘लाइनअप’ बलियो हुँदै गएको छ । आगामी दशैंको फूलपातीमा रिलिजको तयारी गरिएको फिल्ममा पल शाह र रमेश उप्रेतीपछि अब अभिनेता आर्यन सिग्देल भित्रिएका छन् ।

कीर्तिमानी फिल्म ‘पूर्णबहादुरको सारंगी’का निर्माता विनोद पौडेलको नयाँ फिल्म ‘अभिमन्यु’को छायांकन सकिएको छ । गत चैत १९ गते कीर्तिपुरमा क्यामरा र स्क्रिप्ट पूजा गर्दै सुरु गरिएको छायांकन शुक्रबार २५ औं दिनमा प्याकअप भएको हो । अब पोस्ट प्रोडक्सनको काम सुरु हुने निर्माता पौडेलले बताए ।

आगामी असार २७ गतेबाट प्रदर्शनमा आउने तयारीमा रहेको फिल्म ‘यो मन त मेरो नेपाली हो’को दोस्रो गीत सार्वजनिक गरिएको छ । खैँजडी भजनमा आधारित ‘हेर लौ नेपाल आमाको’ बोलको गीतमा नेपालको इतिहासदेखि वर्तमानसम्मको वर्णनसहित एकता र भाइचाराको भाव छ । गीतमा अनिश अधिकारी गायन, शब्द रचना तथा संगीत रहेको छ ।

आगामी जेठ २ गतेबाट प्रदर्शनमा आउने तयारीमा रहेको फिल्म ‘के घर के डेरा : घर नम्बर २’को ट्रेलर सार्वजनिक गरिएको छ । शुक्रबार काठमाडौंमा एक कार्यक्रमका बीच सार्वजनिक ३ मिनेट १९ सेकेण्ड लम्बाइको ट्रेलर मर्मस्पर्शी छ । काठमाडौंमा घर हुने र भाडामा बस्नेको संघर्षको कथालाई ट्रेलरमा प्रस्तुत गरिएको छ । पृष्ठभूमिमा सुनिने काव्यिक ‘न्यारेसन’ ट्रेलरको सशक्त पक्ष छ ।

अहिलेको समयमा फिल्म बनाएर मात्र हुँदैन । प्रभावकारी रुपमा प्रचारप्रसार हुन सकेन भने हलमा फिल्मले दर्शकको अनुहार पनि देख्न पाउँदैन । शुक्रबारबाट प्रदर्शनमा आएको नयाँ फिल्म ‘झिल्को’को हकमा यही भएको छ । पहिलो दिन नै दर्शक अभावले फिल्मको देशभर धेरैजसो शो रद्द भएका छन् । शुक्रबार साँझसम्मका थुप्रै शोमा फिल्मको एउटा टिकट समेत बिक्री भएको छैन ।