यही शुक्रबार (बैशाख २८)बाट प्रदर्शनमा आउन लागेको फिल्म ‘खजुरे ब्रो’बाट पूर्व मिस इन्टरनेशनल नेपाल नीति शाहले डेब्यु गरेकी छन् । उनकै नामका कारण फिल्मको पनि चर्चा भइरहेको छ । फिल्ममा डेब्यु अगाडि नै ‘लाइमलाइट’मा रहेकी नीतिको अभिनयलाई लिएर धेरैमा चासो देखिन्छ । मंगलबार साँझ काठमाडौंको सिभिल मलस्थित क्यूएफएक्स हलमा भएको फिल्मको प्रिमियरमा उनको अभिनयको परीक्षण भयो ।
नीतिको पहिलो फिल्म भएकाले प्रिमियरमा उनी नजिकका अभिनेत्रीदेखि पूर्व मिस नेपालसम्मको उल्लेख्य उपस्थिति देखिएको थियो । अभिनेत्री सन्ध्या केसीले नीतिको अभिनय ‘नेचुलर’ रहेको भन्दै प्रशंसा गरिन् । ‘नीतिको अभिनय ‘नेचुरल’ छ । र, उसलाई ठूलो पर्दामा देख्दा रमाइलो लाग्यो । फिल्म राम्रो छ,’ उनले भनिन् । अर्की अभिनेत्री शुभेक्छा खड्काले फिल्म रमाइलो बनेको प्रतिक्रिया दिँदै नीतिलाई पर्दामा हेर्दा खुसी लागेको बताइन् ।
मोडल ओसिन सिटौलाले फिल्म ‘रिफ्रेसिङ’ लागेको अनुभव सुनाइन् । फिल्ममा नीति एकदमै सुन्दर देखिएको समेत उनको भनाई थियो । फिल्म हेर्न नीतिका आमा-बुबा पनि प्रिमियरमा पुगेका थिए । दुवैले पहिलो प्रयासमा पनि छोरीले राम्रो काम गरेकोमा खुसी व्यक्त गरे । नीतिका बुबाले भने- ‘उसले चाहेको कुरा राम्रोसँग गरेको छ । उसको काम हेर्दा खुसी लाग्यो । पहिलो प्रयासमा जति गरेको छ, धेरै राम्रो छ ।’
प्रिमियरमा मिलेको प्रतिक्रियाले खुसी देखिएकी नीतिले फिल्ममा आफूले राम्रो काम गर्ने प्रयास गरेको बताइन् । ‘मेरो पहिलो फिल्म हो । मैले आफ्नो तर्फबाट १ सय १० प्रतिशत दिएकी थिएँ,’ उनी भन्छिन्, ‘अरु फिल्ममा आफ्नो अभिनय क्षमता अझै निखार्दै जानेछु । यो अवसर दिनुभएकोमा निर्देशकसहित सबैलाई धन्यवाद भन्छु ।’
फिल्ममा खजुरे पात्रको भूमिकामा अभिनय गरेका अभिनेता रेअर राईले फिल्मका लागि आफूले ११ केजी तौल बढाएको अनुभव सुनाए । उनले विरामी हुँदा पनि फिल्ममा काम गरेका रहेछन् । ‘फिल्मका लागि एक महिनामा ११ केजी मोटाएको थिएँ । कति दिनसम्म नुहाइनँ । फोहोर र धुलोले गर्दा म विरामी परेको थिएँ । एक हप्ता त मैले एन्टीबायोटिक खाएरै सुटिङ गरेको थिएँ । काम गर्दा दुःख पनि भयो र मज्जा पनि आयो । अहिले पर्दामा हेर्दा खुसी लाग्यो,’ उनले भने ।
फिल्मका अर्का अभिनेता महेश त्रिपाठीले प्रिमियरमा प्राप्त प्रतिक्रियाले उत्साहित बनाएको बताए । ‘प्रतिक्रिया राम्रो पाएँ । फिल्म हेर्दा ‘इन्जोय’ गर्नुभएको छ,’ उनले भने, ‘फिल्म सुरु हुनुभन्दा अगाडि मलाई डर थियो । तर, हलबाट निस्किँदा सबैले बधाई दिएपछि एककिसिमले मन शान्त भएको छ ।’ उनले फिल्ममा धरानको पात्रमा अभिनय गर्न गाह्रो भएको पनि अनुभव सुनाए ।
फिल्मको प्रिमियरमा पूर्व मिस नेपाल प्रियंका रानी जोशी, अभिनेत्री मलिका महत, भ्लगर सिसन बानियाँ, निर्देशकहरु लक्ष्मण सुवेदी, बसन्त निरौला, लेखक प्रदीप भारद्वाज, निर्माता किरण नेपाली लगायतको पनि उपस्थिति रहेको थियो । प्रिमियरमा नीति नजिकका धेरै सहकर्मीहरु उपस्थित भए पनि मिडियामा प्रतिक्रिया दिने समयमा प्रायः लाखापाखा लागिसकेका थिए ।
सुरज सुनुवारको लेखन तथा निर्देशनमा तयार भएको फिल्ममा नवीन मानन्धर, विनिता थापा, पुष्कर कार्की, प्रकाश भुजेल, मनिष राउत, प्रेम सुब्बा, सुजाता राई, दीपचन्द्र राई, शान्तिला तामाङ लगायतको पनि अभिनय छ । नवीन मानन्धर र सुरज सुनुवार निर्माता रहेको फिल्ममा सुनिल श्रेष्ठ, अनिल मानन्धर र पिकेश मानन्धर सह-निर्मातामा छन् । डायमण्ड उप्रेती कार्यकारी निर्माता हुन् ।
