गत वैशाख २५ गतेबाट प्रदर्शनमा आएको फिल्म ‘लालीबजार’ले तीन सातादेखि बक्स अफिसमा आफ्नो दबदबा कायम गरिरहेको अवस्थामा यसलाई चुनौती दिन शुक्रबारबाट तीन फिल्म ‘रोल नं १’, ‘सेप अफ मोमो’ (छोरा जस्तै) र ‘कुम्भ’ एकसाथ प्रदर्शनमा आएका छन् । यी तीनवटै फिल्म फरक-फरक कथा र कथ्य शैलीमा बनेका हुन् ।

‘रोल नं १’ बाल मनोविज्ञानमा आधारित फिल्म हो । समाजमा आफ्नो इज्जत र प्रतिष्ठाका लागि अभिभावकले आफ्नो सन्तानलाई दिने पढाइको दबाब र त्यसले पार्ने प्रभावको कथा फिल्मले प्रस्तुत गरेको छ । यसमा मुकुन भुसाल, रेणु योगी, निर्भिक रेग्मी, सुशांक मैनाली, सिर्जना अधिकारी, रिन्चेन लामा, संयम कटुवाल, सिजल श्रेष्ठलगायतका कलाकारहरूको अभिनय रहेको छ । 

‘रोल नं १’लाई कीर्तिमानी फिल्म ‘पूर्ण बहादुरको सारङ्गी’का निर्माता विनोद पौडेलले निर्माण गरेका हुन् । यसैले पनि फिल्मप्रति दर्शकमा उच्च अपेक्षा देखिएको छ । जोन योञ्जनको निर्देशनमा बनेको यस फिल्ममा महेश दवाडीको लेखन, शिवराम श्रेष्ठको छायांकन, मदन घिमिरेको सम्पादन, रोहित शाक्यको पार्श्व संगीत तथा उत्तम प्रधानको साउन्ड डिजाइन रहेको छ । 

‘सेप अफ मोमो’ भने भारत र नेपालमा एकसाथ प्रदर्शनमा आएको हो । भारतमा यो फिल्मलाई तमिल अभिनेता राणा दग्गुबतीको ‘स्प्रिट मिडिया’ले प्रदर्शनमा सहयोग गरेको छ भने जोया अख्तर, पायल कपाडिया जस्ता भारतीय फिल्मकर्मी कार्यकारी निर्मातामा छन् । यो फिल्मले विभिन्न अन्तर्राष्ट्रिय फेस्टिभलमा सहभागी भएर केही अवार्ड समेत जितेको छ । 

सिक्किमकी त्रिवेणी राईको निर्देशनमा बनेको यस फिल्ममा भानु माया राई, गौमाया गुरुङ, पशुपति राई, राहुल मुखिया, श्यामाश्री शेर्पालगायतका कलाकारहरूको अभिनय रहेको छ । फिल्मले सिक्किमको हिमाली गाउँको पृष्ठभूमिमा एउटै परिवारका तीन पुस्ताका महिलाहरूको जीवन, सम्बन्ध, मौनता, भावनात्मक विरासत, र पहिचानको कथा प्रस्तुत गरेको छ । 

त्यस्तै, ‘कुम्भ’ प्रेम र बदलाको कथामा आधारित छ । रन्धिर श्रेष्ठको निर्देशनमा बनेको यस फिल्ममा अशोक आर्यन, सुनील थापा, सुशील पोखरेल, रोहित रूम्बा, सृष्टि खड्का, सुरेन्द्र ठाकुरलगायतका कलाकारहरूको अभिनय रहेको छ । फिल्मले देशभर जम्मा १२ वटा शो पाएको छ । यो नेपाली फिल्मको इतिहासै सबैभन्दा कम शो पाउने फिल्म हो ।