अभिषेक बच्चन स्टारर फिल्म ‘द बिग बुल’ ८ अप्रिलबाट ओटीटी प्लेटफर्म डिज्नी हटस्टारमा रिलिज भएको छ । यो फिल्मलाई दर्शक र समीक्षकबाट राम्रो प्रतिक्रिया मिलेको छ । तर, केही सामाजिक सञ्जाल प्रयोगकर्ताले फिल्मको आलोचना पनि गरेका छन् । कतिपयले फिल्ममा अभिषेकको अभिनयलाई ‘थर्ड क्लास’ भनेका छन् । उनले पनि यसको गतिलो जवाफ फर्काएका छन् ।
‘द बिग बुल’ हेरेपछि एक यूजरले लेखेका छन्, ‘सधैं जस्तो अभिषेक बच्चनको कथित ‘थर्ड रेट’ अभिनय, बेकारको लेखाई र झुर तरिकाले फिल्मांकन गरिएको फिल्मले निराश हुन दिएन । प्रतीक गान्धीको ‘स्कम १९९२’ योभन्दा उत्कृष्ट थियो ।’ यसको जवाफमा अभिषेकले लेखेका छन्, ‘मैले तपाईंलाई निराश हुन नदिएकोमा खुसी छु । फिल्म हेर्नका लागि समय निकालेकोमा धन्यवाद ।’
फिल्ममा अभिषेकले शेयर दलाली हर्षद मेहताको भूमिका निर्वाह गरेका छन् । यो चरित्रलाई हंसल मेहता निर्देशित वेब सिरिज ‘स्कम १९९२’ मा प्रतीक गांधीले निभाएका थिए र अब अभिषेकको तुलना प्रतिकसँग गरिएको छ । कुकी गुलाटी निर्देशित तथा अजय देवगन निर्मित फिल्ममा इलियाना डिक्रूज, निकिता दत्ता, सौरभ शुक्ला, राम कपूर लगायतको पनि अभिनय रहेको छ ।
