आफ्नो अभिव्यक्तिले विवादमा छाइरहने अभिनेत्री कंगना रनावटलाई केही वर्ष अगाडिसम्म बक्सअफिसकी क्विन भन्ने गरिन्थ्यो । हरेक प्रकारको भूमिकामा सानदार अभिनय गर्ने उनी आफ्नै काँधमा फिल्म बोकेर सफलता बनाउने ल्याकत राख्थिन् । तर, लगातारको विवादले उनको स्टारडम कमजोर बनेको छ । जुन कुरा उनका पछिल्ला फिल्महरु फ्लप हुनुले पनि प्रमाणित गर्छ ।
यस हप्ता कंगना अभिनीत नयाँ फिल्म ‘धाकड’ प्रदर्शनमा आएको थियो । ट्रेलरमा उनको जबर्जस्त एक्सन अवतारले फिल्मको राम्रो हाइप बनेको थियो । ट्रेड एनालिस्टहरुले फिल्म हिट हुने आँकलन समेत गरेका थिए । तर, योसँगै प्रदर्शनमा आएको कमेडी-हरर फिल्म ‘भूल भूलैया २’ले बक्सअफिसमा आक्रामक कमाई गर्दा कंगनाको फिल्म भने बक्सअफिसमा नराम्रोसँग डुबेको छ ।
पहिलो दिन ६५ लाखको दयनीय ओपनिङ गरेको ‘धाकड’ले दोस्रो दिन ७५ लाख र र तेस्रो दिन १ करोडको कमाई गर्दै तीन दिनमा जम्मा २ करोड ४० लाख ग्रस कलेक्सन गरेको भारतीय बक्सअफिस अनलाइन कोइमोइले उल्लेख गरेको छ । कंगनाको स्टारडमको तुलनामा फिल्मको व्यापार निकै दयनीय मानिएको छ । तीन दिनको व्यापारबाटै फिल्मलाई फ्लप भन्न थालिएको छ ।
प्रदर्शनको पहिलो दिनदेखि दर्शक अभावका कारण फिल्मको मल्टीप्लेक्सहरुमा कयौं शो रद्द भएको भारतीय मिडियाले उल्लेख गरेका छन् । दर्शकको पहिलो रोजाईमा कात्तिक आर्यनको ‘भूल भूलैया २’ परेको छ । ‘वर्ड अफ माउथ’ कमजोर भएका कारण ‘धाकड’ले दर्शकको साथ नपाएको हो । यद्यपि, कंगनाले एक्सनमा गरेको मेहेनतलाई दर्शक र समीक्षकहरुले प्रशंसा गरेका छन् ।
