%20(2)(2)(1).jpg)
फिल्म ‘प्रेमगीत’बाट रातारात चम्किएका प्रदीप खड्का अहिलेका राम्रो माग भएका अभिनेता हुन् । उनको नामले नै फिल्म चल्छ भन्ने विश्वासको भरमा निर्माताले उनीमाथि करोडौं लगानी गरिरहेका छन् । भलै, त्यसको प्रतिफल निर्माताले पाउन सकेका छैनन् । तथापि, उनीमाथिको विश्वास भने अझै डगमगाएको छैन । उनको बढ्दो मागले पारिश्रमिक पनि दिनप्रतिदिन उकालोलाग्दो छ ।
उनलाई मन पराउने दर्शकहरु वर्षमा एउटा भए पनि उनको फिल्म हेर्न चाहन्छन् । तर, विगत तीन वर्षदेखि उनी अभिनीत कुनै फिल्म प्रदर्शनमा आएका छैनन् । पछिल्लो पटक प्रदर्शन भएको फिल्म ‘लभ स्टेशन’पछि उनले ‘प्रेमगीत ३’मा अभिनय गरेका थिए । कोरोना महामारीका कारण यो फिल्मको प्रदर्शन स्थगन हुँदा उनले महामारीकै समयमा अर्को फिल्म ‘प्रकाश’मा अभिनय गरे ।
गएको तीन वर्षमा एउटा पनि फिल्म रिलिज हुँदा छट्पटिएका प्रदीपको यस वर्ष भने एक महिनाको अन्तरमा दुई फिल्म रिलिज हुने भएका छन् । आगामी भदौ १० गते उनले चुनौतीपूूर्ण भूमिका निर्वाह गरेको फिल्म ‘प्रकाश’ रिलिज हुँदैछ भने यसको ठिक एक महिना अर्थात् असोज ७ गते फिल्म ‘प्रेमगीत ३’ प्रदर्शनमा आउने भएको छ । आइतवार यो फिल्मले प्रदर्शन मिति तोकेको हो ।
यी दुवै फिल्म प्रदीपको करिअरका लागि एकदमै विशेष छन् । किनभने, ‘प्रेमगीत २’यता उनका कुनै फिल्म व्यवसायिक रुपमा सफल छैनन् । ‘लभ स्टेशन’लाई त विदेशी फिल्मबाट कथा चोरीको आरोप नै लागेको थियो । यसकारण उनको खस्किँदो ब्रान्डलाई जोगाउन ‘प्रकाश’ र ‘प्रेमगीत ३’ बक्सअफिसमा सफल हुनैपर्ने देखिन्छ । प्रदीप पनि यी दुई फिल्मलाई लिएर आशावादी छन् ।
