५ वर्षपछि शुक्रवार भएको स्थानीय तहको निर्वाचनमा केही कलाकारहरुले पनि विभिन्न पदमा उम्मेदवारी दिएका छन् । राष्ट्रिय प्रजातन्त्र पार्टीबाट काठमाडौं महानगरपालिकाको मेयर पदमा कलाकार मदनदास श्रेष्ठ र यसै महानगरमा स्वतन्त्रबाट चर्चित र्यापर बालेन्द्र शाह उम्मेदवार छन् । काठमाडौंमा अन्य उम्मेदवारभन्दा स्वतन्त्र उठेका बालेन्द्रको मत करीब दोब्बरले बढी छ ।
त्यस्तै, पूर्वको विराटनगर वडा नं. ९ मा फिल्म ‘यो साइनो मायाको’ फेम्ड अभिनेता जतिन ताम्राकार लाल्टिन छाप लिएर स्वतन्त्र वडा सदस्यमा उठेका छन् । अहिले देशभर मतगणना भइरहँदा कलाकारको तर्फबाट विजयी सुरुवात भएको छ । कलाकार किशोर भण्डारी ‘डिट्ठा साहेब’ले नेपाली कांग्रेसबाट काभ्रेस्थली तार्केश्वर वडा नं. २ मा वडा सदस्यमा विजयी हासिल गरेका हुन् ।
भण्डारी लामो समयदेखि अभिनयमा सक्रिय छन् । ‘डिट्ठा साब’ टेलिसिरियलबाट दर्शकमाझ आफूलाई चिनाएका उनी अहिले कान्तिपुर टेलिभिजनबाट प्रशाारण हुने ‘हर्के हल्दार’मा आबद्ध छन् । टेलिसिरियलमा गरेको अभिनय र निर्देशनको अनुभवलाई सर्टिफिकेट मानेर उनले फिल्मको समेत निर्देशन गरिसकेका छन् । उनले ‘चंगा’बाट फिचर फिल्म निर्देशनमा डेब्यू गरेका थिए ।
