टलिउड सुपरस्टार रामचरण अभिनीत फिल्म ‘आरआरआर’ ब्लकबस्टर सावित हुँदा यही अप्रिल २९ बाट प्रदर्शनमा आएको नयाँ फिल्म ‘आचार्य’ले भने बक्सअफिसमा घुँडा टेकेको छ । रामचरणले पिता चिरञ्जीवीसँग एकसाथ काम गरेका कारण यो फिल्मले बक्सअफिसमा आक्रामक कमाई गर्ने आँकलन गरिएको थियो । तर, खराब रिभ्यूका कारण फिल्मको व्यापार चौपट बनेको छ ।
फिल्मले वर्ल्डवाइड रुपमा कमजोर व्यापार गरिरहेको छ । पहिलो दिन विश्वभर फिल्मले ५१ करोड ७ लाख कमाएको थियो । यसलाई फिल्मको सुखद् ओपनिङ मान्न सकिन्छ । तर, दोस्रो दिनबाट फिल्मको कमाईमा ठूलो गिरावट आएको छ । दोस्रो दिन फिल्मले १२ करोड ४३ लाख र तेस्रो दिन ७ करोड ९५ लाख कमायो । फिल्मको तीन दिने कमाई ७१ करोड ४५ लाख पुगेको छ ।
‘आचार्य’ चिरञ्जीवी र राम चरणको होम प्रोडक्सनको फिल्म थियो । एक सय ४० करोडको लगानीमा उनीहरुले फिल्म बनाएका थिए । तर, फिल्मले विश्वभरको कमाईबाट पनि लगानी उठाउन नसक्ने देखिएको छ । यो फिल्मको व्यापारले रामचरणले खेलेका सबै फिल्म हिट हुन्छ भन्ने मान्यता भंग भएको छ । ‘आचार्य’ नचले पनि रामचरण नयाँ फिल्म निर्माणको तयारीमा जुटेका छन् ।
