बलिउडमा साउथ फिल्मको रिमेक बनाउने ट्रेन्ड नै चलेको छ । हिन्दी रिमेकले बक्सअफिसमा राम्रो कमाई गरेका कारण पनि यसतर्फ निर्माता/निर्देशकको आकर्षण बढ्दो छ । यस्तैमा, तेलुगूको ब्लकबस्टर फिल्म ‘हिट’ को पनि हिन्दी रिमेक निर्माण हुने भएको छ । फिल्ममा राजकुमार राव फाइनल भइसकेका छन् भने उनको जोडीको रुपमा सान्या मल्होत्रा देखिने भएकी छन् ।
फिल्म साइन गरेपछि सान्याले भनेकी छन्, ‘मैले ‘हिट’ हेरेको छु र मलाई वास्तवमै फिल्मको अवधारणा मनपर्यो । जब मलाई फिल्म अफर भयो, तब मैले तुरुन्तै हुन्छ भने । यो एक निकै रोचक र रमाइलो कहानी हो । राजकुमारसँग काम गर्न निकै उत्साहित छु ।’ ‘दंगल, बधाई हो, पटाखा, शकुन्तला देवी’ लगायतका फिल्ममा उनको अभिनयको निकै प्रशंसा भएको थियो ।
‘हिट’ ले एक पुलिस अफिसरको कहानी भन्छ, जो एक हराएकी महिलाको खोजीमा रहन्छ । २०२० मा रिलिज भएको फिल्ममा विश्व सेन र रूहानी शर्मा मुख्य भूमिकामा छन् । शैलेश कोलानु निर्देशित फिल्मको निर्माण दक्षिण भारतीय फिल्मका स्टार नानी र प्रशान्ति टिपिरनेनीले गरेका थिए । फिल्मका लागि कलाकार फाइनल भएसँगै अब छायांकन सुरु गर्ने तयारीमा निर्माण टिम छ ।
