.jpg)
भारतमा यतिबेला कोरोना भाइरसको दोस्रो लहरले भयावह रुप लिएको छ । संक्रमण नियन्त्रणभन्दा बाहिर जान थालेपछि आवश्यकता अनुसार विभिन्न राज्यमा लकडाउन गरिएको छ । यस्तो अवस्थामा फिल्ममा आश्रित व्यक्तिहरुले पनि आर्थिक समस्या झेल्नु परेको छ । साउथ अभिनेत्री श्रुति हासनले कोरोनाका कारण आफ्नो आर्थिक अवस्था खराब हुँदै गएको बताएकी छन् ।
लकडाउन र कोरोनाले आफ्नो जिन्दगीमा पारेको असरबारे उनले एक अन्तर्वार्तामा भनेकी छन्, ‘अहिले मलाई पैसाको आवश्यकता छ । म घरमै बसेर कोरोना अन्त्य भएर काममा फर्किने दिनको प्रतिक्षामा छु । म झुट बोल्दिनँ । हामीलाई पनि काममा फर्किनु पर्छ किनकि अन्य मानिस झैँ हामीलाई पनि पैसाको आवश्यकता पर्छ । तर, कोरोनाले काम गर्ने वातावरण छैन ।’
श्रुति, साउथ फिल्मका सुपरस्टार कमल हासनकी छोरी हुन् । आर्थिक रुपमा परिवारबाट सहयोगको बारेमा उनी भन्छिन्, ‘मेरो परिवारमा सबै अलग-अलग कमाई गर्ने गर्दछन् तर हाम्रो कयौं उधारो पनि हुन्छ, जसको भुक्तानी आफैंले गर्नुपर्ने हुन्छ । यसका लागि मलाई काममै फर्किनु पर्ने हुन्छ ।’ उनले हालै किनेको घरको किस्ता तिर्ने समेत आफूसँग पैसा नभएको बताएकी छन् ।
