.jpg)
यही बैशाख २३ गतेदेखि २७ गतेसम्म अनलाइनको माध्यमबाट हुन लागेको नेपाल अन्तर्राष्ट्रिय फिल्म फेस्टिभल (निफ) मा बलिउड निर्माता तथा निर्देशक अनुराग कश्यपले मास्टर क्लास दिने भएका छन् । उद्घाटनपछिको पहिलो सेसनमा उनले दिउँसो ३:३० बाट ४:३० सम्म नेपाली फिल्मकर्मी र दर्शकलाई फिल्म सम्बन्धि आफ्नो अनुभव बाँड्ने निफद्वारा जारी विज्ञप्तिमा भनिएको छ ।
फरक धारका फिल्म निर्माणमा आफ्नो बेग्लै पहिचान बनाएका अनुरागले लेखकको रुपमा करिअर सुरु गरेका थिए । फिल्म ‘पाँच’ बाट निर्देशनमा होमिएका उनलाई फिल्म ‘ग्याङ्स अफ वासेपुर’ ले चर्चामा ल्याएको थियो । यसपछि उनले ‘मनमर्जियाँ’, ‘चोक्ड’, ‘मुक्काबाज’ जस्ता फिल्म निर्देशन गरे । उनले ‘एके भर्सेस एके, आइ एम, अकिरा’ लगायतमा फिल्म अभिनय पनि गरेका छन् ।
यसपटक महोत्सवमा सहभागी फिल्महरु नेट टेलिभिजन र फेस्टिभलको फेसबुक पेजबाट प्रत्यक्ष प्रसारण गरिने निफ अध्यक्ष केपी पाठकले बताए । ‘विश्वका कथाहरुको उत्सव’ नाराका साथ फिल्म संस्कृतिको विकास गर्ने उद्देश्य राखिएको महोत्सवमा यो वर्ष कोरोना महामारीको विषयमा बनेका फिल्मलाई अलग्गै विधामा प्रतिस्पर्धा गराइने र अवार्ड पनि वितरण गरिने उनको भनाई छ ।
