अभिनेता यश स्टारर फिल्म ‘केजिएफ’ च्याप्टर २ को टिजर बिहीवार सार्वजनिक भएको छ । यशको ३५औं जन्मदिनको अवसरमा फिल्मको टिजर सार्वजनिक गरिएको हो । फिल्मको टिजरलाई दर्शकहरुले निकै रुचाएका छन् । २०१८ मा रिलिज भएको ‘केजिएफ’ ले बक्सअफिसमा २५० करोडभन्दा बढी कमाई गरेको थियो । अब दर्शकलाई यसको दोस्रो पार्टको प्रतिक्षा छ ।
आफ्नो जन्मदिनको अवसरमा यशले आफू ४ वर्षदेखि रक्कीको चरित्रमा बाँचिरहेको बताएका छन् । उनले भनेका छन्, ‘म गएको चार वर्षदेखि यो चरित्रमा बाँचिरहेको छु । साँच्चै भन्ने हो भने मैले रक्कीको चरित्र बाँचेको छु । ‘केजिएफ’ च्याप्टर २ मा कयौं रोमाञ्चक र चुनौतीपूर्ण सिक्वेन्स छ । तर, त्यसमध्ये कुनै एक भन्न गाह्रो छ । यसको जवाफ फिल्म रिलिज भएपछि दिनेछु ।’
उनले अगाडि भनेका छन्, ‘पहिलो च्याप्टरमा रक्कीको व्यक्तित्व, उसको दुनियाँ र उभित्रको गलत कुरालाई कन्ट्रोल गर्नका लागि गरिएको कोशिश देखाइएको थियो । तर, यसपटक रक्कीको चरित्र विल्कुलै अलग हुनेछ । जसमा एक्सन र एक इमोशनल राइड हुनेछ, जुन दर्शकलाई मन पर्नेमा विश्वस्त छु ।’ ‘केजिएफ २’ मा यशसँगै सञ्जय दत्त र रवीना टंडनको पनि मुख्य भूमिका छ ।
टिजर हेर्नुहोस् :-
