सुपरस्टार सलमान खान तेलुगू इन्डस्ट्रीमा डेब्यू गर्न लागेको खबरले यतिबेला बलिउड तातेको छ । तेलुगूका मेगास्टार चिरन्जीवीको नयाँ फिल्मबाट उनले साउथ इन्डस्ट्रीमा डेब्यू गर्न लागेको चर्चा छ । मलयालम फिल्म ‘लुसिफर’ को तेलुगू रिमेक ‘गडफादर’ का लागि निर्माण टिमले सलमानलाई अफर गरेको हो । उनले फिल्मका लागि डेट्स दिइसकेको भारतीय मिडियाले बताएका छन् ।
उनले यो फिल्मको छायांकन चाँडै सुरु गर्दैछन् । निर्माण टिम केही दिनमा यो मेगा कोलाब्रेसन (फिल्म) को घोषणा गर्ने तयारीमा छ । सलमान फिल्ममा केमियो रोलमा देखिनेछन् । चिरन्जीवी र सलमानबीच निकै राम्रो सम्बन्ध छ । यस्तोमा यो जोडीलाई पहिलो पटक एकसाथ पर्दामा हेर्न निकै रोचक हुने देखिन्छ । चिरन्जीवीका लागि सलमानले यो फिल्ममा काम गर्न लागेको बताइएको छ ।
उनलाई यसअघि पनि केही साउथ फिल्मबाट प्रस्ताव आएको थियो । तर, उनले बलिउडबाहेक अरु रोजेनन् । चिरन्जीवीसँगको मित्रताका कारण उनी तेलुगू फिल्ममा काम गर्न राजी भएका हुन् । चिरन्जीवी साउथका लिडिङ स्टार मानिन्छन् । अहिले उनी आफ्नो होम प्रोडक्सनको फिल्म ‘आचार्य’ को सुटिङ पूरा गर्न व्यस्त छन् । फिल्ममा उनका छोरा राम चरणको पनि अभिनय छ ।
