नेपाली चलचित्रमा सहायक निर्देशक भई १० बर्ष बिताएर रेखा फिल्म्सको ब्यानरमा निर्माण भएको चलचित्र 'कसले चोर्यो मेरो मन' बाट डेब्यू गरेका निर्देशक सबिर श्रेष्ठ अहिले निर्माताको रोजाईका निर्देशक बनेका छन् । 'कसले चोर्यो मेरो मन' निर्देशन गरे लगत्तै उनले उमा बेबी, कृषा चौलागाईं र सुनिल रावलको चलचित्र  निर्देशन गर्ने अवसर पाएका छन् । उनले निर्देशन गरेको उमा बेबीको चलचित्र 'इशारा' को अहिले सम्पादन भईरहेको छ । 'इशारा' को सम्पादन कक्षमा भेटिएका निर्देशक सबिरसँग फिल्मीखबरको कुराकानी –    

इशारा कस्तो चलचित्र हो ? 

नारी माथि हुने हिंसा, अत्याचार, शोषणका बिरूदको आवाजलाई उठाईएको एक नारी प्रधान चलचित्र हो 'इशारा ' । यसको साथै यो चलचित्रमा माया प्रेममा आउने उतारचढावलाई पनि प्रस्तुत गरिएको छ ।    

सबिरले 'इशारा' मा दिएको नयाँ कुरा ? 

'इशारा' को कथाबस्तु नै नयाँ हो । बिशेष गरी यस मैले चलचित्रमा सेक्स भिडियो सार्वजनिक भएपछि देखिने समस्याहरूलाई पर्दा मार्फत देखाउने प्रयास गरेको छु । जुन अहिलेका टिनेजर्स केटाकेटीहरूमा देखिएका समस्याहरू हुन् ।    

चलचित्रको छायाँकनको लागी सिक्किम पुग्नुको कारण ?
प्राय नेपाली चलचित्रहरू चोभार, मुडे, रानीबारी, भैंसेपाटी जस्ता स्थानहरूमा छायाँकन हुने गर्दछ । सधैंजसो एउटै स्थान हेरेर वाक्क भएका दर्शकहरूलाई नयाँ ठाँऊको स्वाद दिन र चलचित्रलाई स्तरीय बनाउन सिक्किमका रमणिय स्थानहरूमा छायाँकन गर्न गएका हौं ।

लामो समयदेखि चलचित्र क्षेत्रबाट ओझेलमा परेका नायकद्वय उत्तम प्रधान र भुपेन चन्दलाई 'इशारा' मा लिनुको कारण ?    

म चलेको कलाकारलाई लिनु पर्छ भन्ने कुराको बिरोधी हुँ । चलेका अनुहारहरूले अभिनय गरेका अधिकांश चलचित्र असफल भएका उदाहरण प्रसस्तै छन् । उत्तम र भुपेन नेपाली चलचित्र क्षेत्रका राम्रा कलाकार भएकोले मैले उनीहरूलाई लिएको हो । उनीहरूले मेरो चलचित्रको कथालाई न्याय गरेका छन् ।    

एउटा नेपाली चलचित्र निर्माण गर्दा निर्देशकले कति समय खर्चनु पर्छ ? 

करिब ६ महिनामा चलचित्रको सम्पूर्ण कार्य सकिन्छ ।    

६ महिनाको पारिश्रमिक कति हुन्छ ? 

बढीमा ५ लाख । 

एउटा नायकले चलचित्र निर्माणमा कति समय खर्चन्छ र उसको पारिश्रमिक कति हुन्छ ? 

नायकले बढीमा २५ दिन समय दिन्छन् र उनीहरूको पारिश्रमिक ४ लाख सम्म हुन्छ ।    

कामको हिसाबले निर्देशकको पारिश्रमिक नायकको तुलनामा कम भए जस्तो लाग्दैन ? 

लागेर के गर्नु ? निर्देशकहरू आँफैले आफ्नो डिमाण्ड नगर्दा यस्तो भएको हो ।  थोरै पैसामा धेरै चलचित्र निर्देशन गरेर चर्चा आउन खोज्ने प्रवृत्तिले गर्दा निर्देशकहरूले आफ्नो पारिश्रमिक आँफै घटाएका छन् । त्यसको प्रत्यक्ष असर अन्य राम्रा निर्देशकमा परेको छ । हामी निर्देशकहरूले आफ्नो परिश्रमको उचित मूल्य नपाउँदा दु:ख लाग्ने गर्छ । 

तपाईंहरूको पारिश्रमिक कति हुनुपर्छ जस्तो लाग्छ ? 

यति उती भन्नु पर्दा पनि हाम्रो परिश्रमको उचित कदर गर्नुपर्छ । रातदिन चलचित्रकै काममा खटिने हुनाले नाफाको केही प्रतिशत हामीलाई पनि दिनुपर्छ जस्तो लाग्छ तर यो आवाज सुनिदिने को ? 

नेपाली चलचित्रमा राम्रा निर्देशकको नाम लिनुपर्दा क-कस्को नाम लिन चाहनुहुन्छ ?    

प्रताप सुब्बा, उगेन छोपेल, अनिश कोईराला र आकाश अधिकारीलाई मैले राम्रा निर्देशकको रूपमा लिन्छु ।   

यी मध्ये तपाईको मुखले सबैभन्दा पहिला कस्को नाम उच्चारण गर्छ ? 

अनिश कोईराला । किनकी उहाँ मेरो गुरू हुनुहुन्छ ।    

आफूले आफूलाई कसरी परिभाषित गर्नुहुन्छ ? 

नेपाली चलचित्रलाई अन्तरार्ष्ट्रिय बजार सम्म पुर्‍याउन रातदिन चलचित्र निर्माणमा मरिमेट्ने सिकारू चलचित्रकर्मी हो सबिर श्रेष्ठ । 

तपाईंको कुनै सपना ? 

जीवनको उत्तरार्धमा निर शाहले निर्माण गरेको ऐतिहासिक चलचित्र 'बसन्ती' लाई पुन: निर्माण गर्ने सपना छ ।