यही शुक्रबार (९ असोज)बाट प्रदर्शनमा आउन लागेको फिल्म ‘बाः एक योद्धा’ले प्रिमियरमा उत्साहजनक प्रतिक्रिया पाएको छ । मंगलबार साँझ काठमाडौंको सुन्धारास्थित सिभिल मलको क्यूएफएक्स हलमा आयोजित प्रिमियरमा फिल्म हेर्न पुगेका विभिन्न क्षेत्रका व्यक्तिले कथावस्तु, कलाकारको अभिनय, छायांकन र संगीत पक्षको मुक्तकण्ठले प्रशंसा गरे । 

प्रिमियरमा पुगेका अभिनेता हरिवंश आचार्यले फिल्मले आफूलाई भावुक बनाएको बताए । उनले भने, ‘फिल्म हेरेर मलाई रुन मन लाग्यो । छोरा मान्छे सितिमिति रुँदैनन् तर मनमनै धेरै रोएँ ।’ फिल्मले वर्तमान समाजमा युवाहरूको बढ्दो अपेक्षा र पलायनसँगै बुवाआमाले सन्तानका लागि गर्ने त्यागलाई मर्मस्पर्शी रूपमा प्रस्तुत गरेको उनले बताए ।

पूर्वगृहमन्त्री तथा अधिवक्ता ओमप्रकाश अर्यालले ‘बा: एक योद्धा’लाई उत्कृष्ट फिल्मका रूपमा ब्याख्या गरे । उनले फिल्मको कथावस्तु, प्रस्तुति र सन्देश आफूलाई प्रभावकारी लागेको बताए । ‘हामी नेपालीको जुन किसिमको जनजीवन छ, त्यसलाई फिल्मले समेटेको छ । कथा उत्कृष्ट छ, प्रस्तुति पनि उत्कृष्ट छ र यसले दिन खोजेको सन्देश पनि उत्कृष्ट छ,’ उनले भने ।

त्यस्तै, अभिनेत्री ऋचा शर्माले फिल्म ‘एकदमै मिठो’ लागेको बताइन् । उनले दिव्य देवको अभिनयको प्रशंसा गर्दै उनलाई ‘बाः एक योद्धा’को सुपरस्टारको संज्ञा दिइन् । उनले भनिन्, ‘यो फिल्मको सुपरस्टार भनेको दिव्यदेव पन्त हो । उहाँलाई फिल्मले आफ्नो अभिनय क्षमता देखाउने एकदमै राम्रो अवसर दिएको छ । मलाई उहाँजस्तो कलाकारले सफलताको शिखर चुम्नुपर्छ भन्ने लाग्छ ।’

कान्स विजेता फिल्म ‘एलिफेन्ट्स इन द फग’की अभिनेत्री पुष्पा थिङ लामाले पनि ‘बा: एक योद्धा’ले आफूलाई भावुक बनाएको बताइन् । ‘फिल्मले मलाई धेरै ठाउँमा रुवायो । अझ विशेषगरी दिव्यदेवको ‘तिम्रो एक खिल्ली चुरोटले मलाई ऋणी बनायो’ भन्ने संवादले निकै छोयो । दिव्यदेवले बुवाको भूमिकामा गर्नुभएको अभिनय त झन् असाधारण छ,’ उनले भनिन् । 

हरि लम्सालको निर्देशन तथा वसन्त लम्सालको लगानीमा बनेको यस फिल्ममा दिव्यदेव, झरना थापा, सुहाना थापा, माओत्से गुरुङ, अनिल बुढाथोकी, सागर खनाल, शिशिर सिवाकोटी, सुप्रज्ञा शर्मा, शवि थापालगायतका कलाकारहरूको अभिनय रहेको छ । फिल्मले सन्तानका लागि बाबुले गर्ने त्याग, संघर्ष र बुढेसकालमा सन्तानबाटै भोग्नुपर्ने पीडालाई कथाको केन्द्रमा राखेको छ ।