.jpg)
जबर्जस्ती करणीको आरोप लागेका अभिनेता पल शाहले थप १२ दिन हिरासतमा विताउनु पर्ने भएको छ । चार दिन भूमिगत जीवन विताएपछि गत आइतबार प्रहरीसमक्ष आत्मसमर्पण गरेका उनलाई पहिलो चरणमा अदालतले ७ दिन हिरासतमा राखेर अनुसन्धान गर्न अनुमति दिएको थियो । आज दोस्रो पटक अदालतले थप १२ दिन हिरासतमा राख्न प्रहरीलाई अनुमति दिएको हो ।
आइतवार दिउँसो प्रहरीले एक हप्ताको अनुसन्धान पूरा गरेर पल शाहलाई म्याद थप गर्नका लागि तनहुँ जिल्ला अदालत लगेको थियो । प्रहरीलाई अदालतको अनुमतिमा २४ दिनसम्म हिरासतमा राखेर अनुसन्धान गर्ने अनुमति हुन्छ । एक सातादेखि प्रहरीले यो केशलाई हरेक कोण र आधारबाट अनुसन्धान गरिरहेको छ । सम्भवतः १२ दिनपछि अदालतमा बहस प्रक्रिया सुरु हुन सक्नेछ ।
१७ वर्षिय एक नाबालिग गायिकाले पलमाथि जबर्जस्ती करणीको आरोपमा फागुन ११ गते तनहुँ जिल्ला प्रहरी कार्यालयमा जाहेरी दिएकी थिइन् । यसपछि प्रहरीले पलको खोजी गरेको थियो । तर, चार दिन भूमिगत भएपछि पलले प्रहरीसमक्ष आत्मसमर्पण गरेका थिए । ती नाबालिग गायिकाले विभिन्न समयमा पटक-पटक जबर्जस्ती बलात्कार गरेको आरोप शाहमाथि लगाएकी छन् ।
