बालबालिकाको विषयलाई समेटेर बिरलै मात्रामा फिल्म बन्ने गरेको पाइन्छ । बालबालिका भविष्यका कर्णाधार हुन् यिनीहरुको मनोविज्ञानका विषयमा केही जानकारी सबैलाई होस् भन्ने उद्देश्यले बालमनोविज्ञानमा आधारित नेपाली फिल्म 'ठूलो मान्छे बन्ने' भएको छ ।
धरानमा लामो समयदेखि नृत्य विद्यामा काम गरेको युनाइटेड मल्टि आर्टस्ले बालबालिकाको मनोविज्ञानलाई आधार बनाएर सो फिल्म निर्माण गर्ने भएको हो । फिल्मको धरानमा एक कार्यक्रमको बीच सुभमुहर्त समेत गरिएको छ । करिब २५ लाख रुपैया बराबरको लागतमा निर्माण हुन लागिरहेको सो फिल्ममा अधिकांश कलाकार बालबालिका नै रहेको निर्देशक प्रसान्त तामाङले जानकारी दिए ।
निर्देशक तामाङले बालबालिकालाई लक्षित गरी कमैमात्र फिल्म निर्माण हुने र बनेका फिल्म समेत विकृतितर्फ बढी उन्मुख हुने गरेकाले आफूहरुले यो फिल्मको निर्माण कार्य शुरु गरेको बताए । एउटा बच्चालाई ठूलो मान्छे बन्नका लागि के-के गर्नुपर्छ भन्ने विषय यो फिल्ममा देखाईने उनले बताए । अधिकांश पुर्वेली त्यसमा पनि नयाँ कलाकारहरुको अभिनय सो फिल्ममा ५ जना बालकहरु मुख्य भुमिकामा रहेको उनले बताए ।
कथा समेत तामाङकै रहेको फिल्ममा बालकहरु अभिरल शर्मा, उज्वल कुढाथोकी, कौशल याख्खा, रोमन लिम्बु, आषिश ठाकुर र विवेक थेवे मुख्य भुमिकामा देखिने छन् । फिल्मलाई प्रदिप खड्काले लगानी गर्नेछन् । बुधबारबाट सुटिङ शुरू गरेर मंसीर पहिलो साता सक्ने तथा चैत्रमा रिलिज गर्ने निर्माता खड्काले जानकारी दिए । संदिप श्रेष्ठको छायाङ्कन रहने फिल्ममा संगीत संजिव प्रधान, जिवन भट्टराई र नवराज वस्नेतको रहेको छ ।
